Amerika Qo‘shma Shtatlari prezidenti Donald Tramp ma’muriyati Florida shtatidagi «Alligator Alkatraz» nomi bilan mashhur bo‘lgan hibsxonani yopishga qaror qildi. Milliy xavfsizlik departamenti (DHS) barcha noqonuniy muhojirlarni boshqa muassasalarga ko‘chirishni yakunlaganini ma’lum qildi.

DHS matbuot kotibi Loren Bisning so‘zlariga ko‘ra, bu qaror Atlantika okeanida bo‘ronlar mavsumi boshlanishi bilan bog‘liq xavfsizlik choralari doirasida qabul qilingan. U qancha odam ko‘chirilgani va ular qayerga jo‘natilgani haqida batafsil ma’lumot bermadi.

«Alligator Alkatraz» deyarli bir yil oldin, 2025-yil 19-iyunda e’lon qilingan va 2025-yil iyul oyida ochilgan edi. U San-Frantsiskodagi mashhur Alkatraz qamoqxonasi sharafiga nomlangan bo‘lib, atrofdagi botqoqliklar qochishga urinishlarning oldini olish vositasi sifatida ishlatilgan.

Florida bosh prokurori Jeyms Utmeyer hibsxonani «vaqtinchalik muassasa» deb ta’riflagan va «agar odamlar qochib ketsa, ularni timsohlar va ilonlardan boshqa hech narsa kutmaydi» degan edi. Prezident Tramp va Florida gubernatori Ron Desantis ochilish marosimida shaxsan qatnashgan.

Biroq, hibsxona faoliyati davomida ko‘plab tanqidlarga uchradi. Mahalliy hindular rahbarlari, huquq himoyachilari va advokatlar muassasaning uzoq joylashuvi, issiq iqlim va bo‘ronlar davrida yaroqsiz sharoitlari haqida shikoyat qilgan. Mahbuslar advokat bilan uchrashish huquqidan mahrum qilingan, tibbiy yordam ko‘rsatilmagan va ovqatda qurtlar topilgani aytilgan.

Amerika fuqarolik erkinliklari ittifoqi (ACLU) advokati Emi Godsholl «bu shafqatsiz muassasadan odamlarni ko‘chirish muhim qadam, ammo yetkazilgan zararni yo‘q qilmaydi» deb ta’kidladi. U hibsxonani butunlay yopish va boshqa hech qachon foydalanmaslikka chaqirdi.

Source: www.aljazeera.com