Shotlandiya politsiyasi 36 yoshli erkakni Edinburgda 19-iyun kuni sodir etilgan bir qator hujumlarda ayblaganini ma'lum qildi. Hujumlar natijasida besh kishi yaralangan, ulardan uchtasi kasalxonaga yotqizilgan.

Britaniya Bosh vaziri Keyr Starmer hujumlarni "musulmonlarga qarshi nafrat" bilan bog‘lab, keskin qoraladi. U o‘zining X’dagi postida "Hech kim ko‘chalarimizda zo‘ravonlikka duch kelmasligi kerak. Gumonlanuvchi musulmonlarga qarshi nafrat bilan harakat qilgan ko‘rinadi. Men bunga toqat qilmayman – u qonun oldida javob beradi", deb yozgan.

Shotlandiya birinchi vaziri Jon Svinni ham hujumlarni qoralab, "Mamlakatimizda zo‘ravonlik, irqchilik yoki murosasizlikka o‘rin yo‘q", dedi. U hukumatning jamoalarni qo‘llab-quvvatlashini ta'kidladi.

Politsiya shahar bo‘ylab tahdidlar, talonchilik va vandalizmni o‘z ichiga olgan zo‘ravon hujumlar haqida xabar berilganiga javoban tergov boshlagan. Terrorizmga qarshi bo‘lim ham ishga jalb qilingan.

Mahalliy ommaviy axborot vositalariga ko‘ra, hujumlar Edinburg g‘arbidagi masjid yaqinida boshlanib, shaharning boshqa qismlariga tarqalgan. Ijtimoiy tarmoqlarda ko‘ylaksiz erkakning qurol ko‘tarib yurgani va politsiya tomonidan ushlanib, "mamlakatni himoya qilish" haqida baqirgani aks etgan video tarqalgan.

Ushbu voqealar Buyuk Britaniyada musulmonlar va muhojirlarga qarshi kayfiyatning kuchayishi, jumladan Belfast va boshqa shaharlardagi tartibsizliklar fonida sodir bo‘ldi.

Source: www.dw.com