Monako hukumati Ukrainada tug‘ilgan biznesmen Vadim Yermolayevga qarshi uyushtirilgan portlashda gumonlanayotgan ayolga nisbatan Interpolning Qizil Bildirishnomasi va hibsga olish orderini chiqardi. Portlash natijasida Yermolayev, uning sherigi va 13 yoshli o‘g‘li jarohatlandi.

Gumonlanuvchi 39 yoshli Anastasiya Berezovska ismli Ukraina fuqarosi ekanligi aniqlangan. Uchta ayblov qo‘yilgan: qotillikka suiqasd, jamoat joyida portlovchi qurilma o‘rnatish va jinoiy til biriktirish.

Dastlabki ma’lumotlarga ko‘ra, Berezovska jinoyat vaqtida erkak kiyimida bo‘lgan va kuzatuv kameralarida erkak sifatida tasvirlangan. Uning o‘ng qo‘lida ilon tatuirovkasi borligi va nemis tilida gaplashishi qayd etilgan.

Monako prokurori Stefan Tiboning so‘zlariga ko‘ra, gumonlanuvchi samarali xalqaro hamkorlik orqali aniqlangan. Uning Germaniyada ko‘rilgani haqida xabarlar bor.

Portlash 2023-yilda Ukraina hukumati tomonidan sanksiyalangan Yermolayevga qarshi qilingan deb taxmin qilinmoqda. U Rossiya tomonidan anneksiya qilingan Qrimda biznes yuritishda ayblangan.

Source: www.dw.com