O‘zbekiston Prezidenti Shavkat Mirziyoyev Xitoy Xalq Respublikasi Raisi Si Szinpinga maktub yo‘llab, mamlakatda yuz bergan suv toshqini va yong‘in oqibatidagi qurbonlar va vayronagarchiliklar munosabati bilan chuqur ta’ziya izhor etdi.

Davlat rahbari Guangsi-Chjuan avtonom rayonidagi suv toshqini hamda Futszyan provinsiyasidagi yirik yong‘in natijasida ko‘plab odamlarning halok bo‘lishi va jarohat olishi bilan bog‘liq holda Xitoy xalqiga hamdardlik bildirdi. Murojaatda Mirziyoyev marhumlarning oila a’zolariga ta’ziya so‘zlarini yetkazib, barcha jabrlanganlarga tezroq sog‘ayib ketishlarini tiladi.

Avvalroq Xitoy janubidagi keng ko‘lamli suv toshqini qurbonlari soni 39 kishiga yetgani, yana to‘qqiz nafar fuqaro bedarak yo‘qolgani haqida xabar berilgan edi.

Source: podrobno.uz