Qatar, Misr, Pokiston va boshqa vositachilar AQSh va Eronni harbiy harakatlarni 10 kunga to‘xtatishga chaqirdi. Bu haqda Axios nashri o‘z manbalariga tayanib xabar berdi.

Taklifga ko‘ra, sulh vaqtida Hurmuz bo‘g‘ozida kemalar harakati qayta tiklanishi, shuningdek, AQSh va Eron uzoq muddatli foydalanish shartlarini muhokama qilishni boshlashi kerak.

AQSh prezidenti Donald Tramp ma’muriyati vositachilarning taklifini o‘rganmoqda va Isroilni diplomatik jarayonga zarar yetkazishi mumkin bo‘lgan qadamlardan tiyilishga chaqirgan.

Shu bilan birga, AQSh mintaqaga qo‘shimcha harbiy kuchlarni joylashtirish orqali muzokaralarning muvaffaqiyatsizlikka uchrashiga tayyorgarlik ko‘rmoqda.

Pentagon 20-iyul kuni Eron bilan urushning so‘nggi ikki haftasida 100 ga yaqin amerikalik harbiy yaralanganini ma’lum qildi. Bu mojaroni tugatish bo‘yicha muzokaralar barbod bo‘lganidan beri Eronning AQSh harbiy obyektlariga bergan zarbalari kuchayganini ko‘rsatadi.

AQSh Markaziy qo‘mondonligi dushanba kuni kechqurun Eronga qarshi yangi zarbalar berganini ma’lum qildi. Eron davlat OAVlari bir nechta hududlarda portlashlar yuz berganini xabar qildi.

Tramp harakatlarni qanday davom ettirishni ko‘rib chiqayotgan bir paytda, AQSh Yaqin Sharqdagi qiruvchi samolyotlar sonini oshirmoqda. Isroilga o‘nlab AQSh yonilg‘i tashuvchi samolyotlari yetib kelgan.

Kuvayt “dushman nishonlarini” tutib oldi, Bahraynda trevoga sirenalari chalindi va Iordaniya Eron raketalarini urib tushirganini bildirdi. Eron ushbu uchta mamlakatga hujumlarni kuchaytirdi.

Source: www.gazeta.uz