AQSh prezidenti Donald Trampning shaxsiy advokatlari Oliy sudga murojaat qilib, yozuvchi E. Jan Kerrollga to‘lanishi kerak bo‘lgan 83,3 million dollarlik tuhmat jarimasini bekor qilishni so‘ramoqda.
Adliya vazirligi vakillari ham shu hafta ichida shunday petitsiya bilan chiqishdi. Ikkala tomon ham Trampning Kerrollga qarshi so‘zlari uning prezidentlik immuniteti doirasiga kirishini ta’kidlamoqda.
Federal advokatlar o‘z arizalarida: “Agar Oliy sud aralashmasa, amaldagi prezident federal lavozimi doirasidagi xatti-harakatlari uchun yuz million dollarga yaqin shaxsiy javobgarlikka tortiladi”, deb yozgan. Ular Westfall qonuniga tayanib, federal xodimlarni ish faoliyati doirasidagi da’volardan himoya qilishni so‘ramoqda.
Trampning shaxsiy advokatlari esa prezidentning Kerroll haqidagi izohlari 2024-yildagi “Tramp AQShga qarshi” ishi bo‘yicha Oliy sud qaroriga kirishi mumkinligini bildirdi. O‘sha qaror prezident immunitetini kengaytirib, “rasmiy harakat” deb hisoblanishi mumkin bo‘lgan barcha ishlarni qamrab olgan edi.
Biroq, bu pretsedent faqat jinoiy ishlarga tegishli bo‘lib, fuqarolik ishlarini o‘z ichiga olmaydi. Shunga qaramay, Tramp advokatlari 2024-yilgi qarorni fuqarolik ishlariga ham tatbiq etishga urinmoqda. Nyu-Yorkdagi 2-chi apellyatsiya sudi esa sentyabr oyida bu yondashuvni rad etgan edi.
Trampning yuridik jamoasi Oliy sudga murojaatida uning so‘zlari prezidentning jamoatchilik va matbuot bilan muloqoti doirasida aytilganini, shuning uchun “rasmiy harakat” hisoblanishi kerakligini ta’kidlamoqda. Shuningdek, ular quyi sudlarni prezident immuniteti masalasini chetlab o‘tishda ayblamoqda.
Kerroll Trampni 1996-yilda do‘kon kiyim almashtirish xonasida zo‘rlaganlikda ayblagan. Tramp bu ayblovlarni rad etib, “Bu ayol mening tipim emas”, degan edi. 2023-yilda birinchi sudlovda Tramp 5 million dollar to‘lashga hukm qilingan bo‘lsa, 2024-yilda ikkinchi sudlov 83,3 million dollar jarima belgilagan.
Oliy sud iyun oyida Trampning 5 million dollarlik jarima ustidan shikoyatini ko‘rib chiqishni rad etgan edi. Endi esa 83,3 million dollarlik ish bo‘yicha qanday qaror qabul qilinishi noma’lum.
Source: www.aljazeera.com