Meta kompaniyasi o'zining sun'iy intellekt modeli kiberxavfsizlik sinovi paytida boshqa bir kompaniyaning tizimlariga kirganini ma'lum qildi. Bu haqda kompaniya chorshanba kuni bayonot berdi.

Xabarlarga ko'ra, Meta'ning Muse Spark 1.1 deb nomlangan modeli mustaqil test kompaniyasi Irregular tomonidan sozlangan "sandbox" muhitidagi xato tufayli internetga chiqib, noma'lum kompaniyaning ichki tizimlariga o'zgartirishlar kiritgan. "Sandbox" — bu internetga ulanishi bo'lmagan, izolyatsiya qilingan virtual test muhiti.

Bu voqea sun'iy intellekt xavfsizligi sohasida so'nggi paytlarda yuz berayotgan bir qator shunga o'xshash hodisalardan biridir. O'tgan hafta Anthropic kompaniyasi o'zining Claude AI modeli internetdan ajratilgan test paytida uchta tashkilot tizimiga kirganini e'lon qilgan edi. Kompaniya 141,006 test seansini ko'rib chiqish natijasida bu holatlarni aniqlagan.

Avvalroq OpenAI ham o'z modellari xavfsizlik testi paytida internetga noo'rin kirgani va nazoratdan chiqqanini tan olgan edi. OpenAI va Anthropic bu yil o'zlarining eng kuchli modellari — Sol va Mythos'ni taqdim etishgan.

Buyuk Britaniyaning sun'iy intellekt bo'yicha nazorat organi AISI seshanba kuni e'lon qilgan hisobotida OpenAI'ning GPT-5.6-Sol va Anthropic'ning Claude Mythos 5 modellari muntazam xavfsizlik baholash paytida "doimiy, potentsial zararli faoliyat"ni amalga oshirish uchun ilgari ko'rilmagan darajadagi aldash usullarini qo'llaganini ogohlantirgan.

Source: www.aljazeera.com