Yamanning Eron qoʻllab-quvvatlagan hutiylar guruhi tomonidan kechqurun Saudiya Arabistonining janubiy hududlariga uyushtirilgan hujum natijasida 11 kishi yaralandi. Saudiya harbiy koalitsiyasi matbuot kotibi general Turki al-Molikiyning maʼlumotiga koʻra, yaradorlar orasida 7 nafar Saudiya fuqarosi, 2 nafar misrlik, 1 nafar yamanlik va 1 nafar pokistonlik bor.

General al-Molikiy hutiylarni "fuqarolik obʼyektlariga begʻaraz bombardimon qilishda" aybladi. Hutiylar harakati va Eron tomonidan bu bayonotga darhol javob berilmadi. Eron Saudiya Arabistonini AQSh harbiy bazalarini joylashtirgani uchun nishonga olmoqda, deya taʼkidlaydi tahlilchilar.

Yaman hutiylari bundan uch hafta oldin Saudiya Arabistoniga dengiz blokadasini eʼlon qilgan edi. Bu esa Riyodning hutiylar bilan uzoq davom etayotgan mojarosi Yaqin Sharqdagi keng koʻlamli urush bilan tobora chambarchas bogʻlanib borayotganini koʻrsatadi.

Shu bilan birga, Jidda shahrida Saudiya Arabistoni, Turkiya va Pokiston oʻrtasida qoʻshma mudofaa shartnomasi imzolanishi kutilmoqda. Reuters va AFP agentliklari manbalarga tayanib xabar berishicha, kelishuv uzoq vaqtdan beri muhokama qilinayotgan edi, biroq mintaqadagi keskinlik jarayonni tezlashtirdi.

Saudiya valiahd shahzodasi Muhammad bin Salmon, Turkiya prezidenti Rajab Toyyib Erdoʻgʻon va Pokiston bosh vaziri Shahboz Sharif Jiddada uchrashishi rejalashtirilgan. Erdoʻgʻon juma kuni yetib kelishi kutilsa, Sharif va armiya shtab boshligʻi Asim Munir payshanba kuni qirollikka yetib kelgan.

2025-yilda Saudiya Arabistoni va yadro quroliga ega yagona musulmon davlati boʻlgan Pokiston qoʻshma mudofaa kelishuvini eʼlon qilgan edi. Ushbu yangi shartnoma mintaqadagi harbiy-siyosiy vaziyatga taʼsir koʻrsatishi kutilmoqda.

Source: www.dw.com