Avstraliyalik tennischi Nik Kirgios kokain testi ijobiy chiqqani uchun vaqtincha musobaqalardan chetlashtirildi. Bu haqda Xalqaro tennis halollik agentligi (ITIA) chorshanba kuni e'lon qildi.
31 yoshli sportchi iyun oyida Mallorkada bo'lib o'tgan ATP turnirida namuna topshirgan edi. Tahlil natijasida uning namunasida kokainning metaboliti bo'lgan benzoilekgonin moddasi aniqlangan. Kokain Butunjahon antidoping agentligi (WADA) taqiqlangan moddalar ro'yxatiga kiritilgan stimulyator hisoblanadi.
WADA laboratoriyasi Kirgios namunasida taqiqlangan stimulyator borligini 17 iyulda tasdiqlagan. Shu sababli 4 avgustdan boshlab sportchi vaqtincha diskvalifikatsiya qilingan. ITIA ma'lumotlariga ko'ra, diskvalifikatsiya davrida Kirgios tennis bo'yicha biron-bir musobaqada qatnasha olmaydi, murabbiylik qila olmaydi va hatto rasmiy tadbirlarda ishtirok eta olmaydi.
Kirgios o'z muxlislariga ijtimoiy tarmoqlarda murojaat qilib, kechirim so'radi va "katta xato qilganini" tan oldi. "Men katta xato qildim. Muxlislarim, oilam, homiylarim va menga yaqin bo'lgan barchadan uzr so'rayman. Eng muhimi, meni kuzatib borayotgan bolalardan uzr so'rayman. Bu qanday o'rnak bo'lishini bilaman va o'zimdan juda hafsalam pir bo'ldi", dedi u.
Kirgios o'z faoliyatida ATP turnirlarida yettita chempionlikni qo'lga kiritgan va 2016-yilda jahon reytingida 13-o'ringa ko'tarilgan edi. Uning eng yaxshi natijasi 2022-yilda Uimbldon finaliga chiqishi bo'lib, u yerda Novak Jokovichga to'rt setda imkoniyatni boy bergan edi.
O'shandan beri u ko'plab jarohatlar bilan kurashib kelmoqda va avvalgi formaga qayta olmagan. Hozirda u jahon reytingida 919-o'rinni egallab turibdi. Kirgios jarohatlar unga jismoniy va ruhiy jihatdan og'ir ta'sir qilganini aytdi.
"Tanam ongim kutgan narsani qila olmayapti va faoliyatim oxiriga yaqinlashayotganimni anglash men tasavvur qilganimdan ham qiyin bo'ldi", dedi u. Avstraliyalik tennischi vaqtincha diskvalifikatsiya qaroriga e'tiroz bildirmagan va 28 kun davomida ijtimoiy tarmoqlardan uzoqlashib, o'zini tiklashga e'tibor qaratishini ma'lum qilgan. "Kechirasiz, men ishlayman va yaxshiroq qaytaman", dedi u.
Source: www.dw.com