Hindiston hukumatining bolalar xavfsizligiga oid qat'iy talablari fonida, amerikalik texnologiya giganti Meta kompaniyasi bolalar xavfsizligiga oid, shu jumladan bolalarga nisbatan jinsiy zo'ravonlik holatlarini Hindiston huquq-tartibot idoralariga, xususan, Hindiston Kiberjinoyatchilikni muvofiqlashtirish markazi tomonidan boshqariladigan kiberjinoyat portaliga xabar qilishga rozi bo'ldi. Bu haqda hind ommaviy axborot vositalari hukumat manbalariga tayanib xabar berdi.
Meta vakilining so'zlariga ko'ra, endi bunday holatlar tegishli huquq-tartibot idoralariga yuboriladi. Bu qadam Hindistonda Meta'ning Facebook va Instagram platformalarida sun'iy intellekt yordamida yaratilgan bolalarga oid jinsiy zo'ravonlik materiallarini targ'ib qiluvchi pullik reklamalar joylashtirilgani haqidagi ayblovlar ortidan qo'yildi. Hukumat manbalari bu qadamni "bolalar uchun xavfsiz platformalar yaratish yo'lidagi birinchi qadam" deb baholadi va "hali ko'p ish qilish kerak"ligini ta'kidladi.
Hindiston hukumati boshqa onlayn platformalar bilan ham bunday kontentni faol ravishda aniqlash va olib tashlash bo'yicha muzokaralar olib bormoqda. Manbalarga ko'ra, hukumat onlayn bolalar xavfsizligini ta'minlash uchun faol choralar ko'rmagan platformalarga qarshi choralar ko'radi. "Onlayn bolalar xavfsizligi har qanday ijtimoiy media platformasi uchun asosiy tamoyil bo'lib, u muzokara qilinmaydi", deyiladi xabarlarda.
Iyul oyida BBCning tergov reportaji Instagram Hindistonda bolalarga oid jinsiy zo'ravonlik materiallarini targ'ib qiluvchi pullik reklamalarni namoyish etganini aniqlagan edi. Shundan so'ng Hindiston Elektronika va axborot texnologiyalari vazirligi Instagram'ga bunday materiallarga kirishni osonlashtiruvchi barcha reklama va kontentni o'chirishni buyurdi. Vazirlik, shuningdek, batafsil tushuntirish talab qilib, Meta rahbarlari bilan bir necha bor muzokaralar o'tkazdi.
O'tgan hafta Hindiston Milliy bolalar huquqlarini himoya qilish komissiyasi (NCPCR) Meta Hindistonning boshqaruvchi direktori va rahbarini bolalarga oid jinsiy zo'ravonlik materiallariga oid reklamalar bo'yicha tergov doirasida chaqirdi. AQShda joylashgan notijorat Tech Transparency Project (TTP) tashkiloti esa joriy yilda Facebook va Instagram'da 300 dan ortiq bunday reklamalar aniqlanganini, ulardan 84 tasi Hindistonda joylashtirilganini, shundan 78 tasi hukumatning Meta'ga qarshi ko'rsatmasidan keyin ham davom etganini ma'lum qildi.
Source: www.dw.com