Yaman g‘arbidagi Qizil dengiz sohilida joylashgan strategik Muxa shahri husiylar harakati qo‘liga o‘tgach, u yerda qolayotgan minglab tinch aholining turmush tarzi og‘ir inqiroz yoqasiga kelib qoldi. Sentyabr oyi boshida xalqaro miqyosda tan olingan Yaman hukumati kuchlari chekinishi ortidan shaharga kirib kelgan husiylar komendantlik soati joriy etgan, rasmiy hukumat esa shaharni «zarba hududi» deb e’lon qilib, harbiylashgan harakatlarga qarshi o‘t ochilishi haqida ogohlantirgan.

Shaharda qolgan mahalliy aholi vakillarining ta’kidlashicha, hududni tark etish deyarli imkonsiz bo‘lib qolgan. Transport xarajatlarining keskin oshishi, yo‘llarning xavfliligi va har ikki tomon to‘siqlari ko‘pchilikni o‘z uylarida qolishga majbur qilmoqda. Ko‘chib ketishga moddiy imkoniyati yetmagan oilalar va keksalar og‘ir qashshoqlik sharoitida kun kechirmoqda. Shaharda oziq-ovqat va gaz narxlari ikki barobardan ziyod qimmatlashgan, elektr ta’minoti esa deyarli to‘xtagan.

Hududda gumanitar va tibbiy inqiroz ham chuqurlashib bormoqda. «Chegara bilmas shifokorlar» (MSF) ma’lumotlariga ko‘ra, shifoxona xodimlarining katta qismi shaharni tark etgani sababli deyarli barcha sog‘liqni saqlash muassasalari faoliyatini to‘xtatgan, faqat markaziy shifoxonada sanoqli shifokorlar qolgan. Husiylar esa ba’zi tibbiy jihozlarni poytaxt Sanoga olib ketgani aytilmoqda.

Shuningdek, «zarba hududi» deb e’lon qilingan shaharda tinch aholi vakillarining qurbon bo‘lishi holatlari qayd etilmoqda. 22-sentyabr kuni amalga oshirilgan havo hujumlaridan birida bir oilaning olti nafar a’zosi halok bo‘lgan. Mahalliy aholi nafaqat tinimsiz bombardimonlardan, balki yosh yigitlarning majburan front chizig‘iga safarbar qilinishidan ham jiddiy xavfsiramoqda.

Source: www.aljazeera.com