Vashington hukumati Xalqaro jinoiy sudga (XJS) nisbatan yangi va keskin cheklov choralari joriy etilganini ma'lum qildi. Ushbu qadam Nobel Tinchlik mukofoti xalqaro huquqni himoya qiluvchi tashkilotlarga berilganidan bir necha soat o'tib amalga oshirildi. Amerika rejimining ta'kidlashicha, mazkur sud go'yo o'z vakolatlarini suiiste'mol qilgan va suveren davlatlarning ishlariga asossiz ravishda aralashib kelmoqda.

AQSh Davlat kotibi Marko Rubio ijtimoiy tarmoqlarda e'lon qilgan videomurojaatida ushbu "shubhali sud" bilan har qanday moliyaviy tranzaksiyalar taqiqlanishini va uning resurslari keskin qisqartirilishini ma'lum qildi. Vashington rejimining qaroriga ko'ra, Amerika va uning ittifoqchilari ushbu xalqaro tuzilmaning yurisdiksiyasiga bo'ysunmaydi. Avvalroq ham AQSh tomonidan sud’yalarga hamda turli xodimlariga nisbatan sanksiyalar joriy etilgan edi.

Mutaxassislarning fikricha, ushbu bosim xalqaro adolat tizimiga jiddiy putur yetkazishi va global xavfsizlik arxitekturasini izdan chiqarishi mumkin. BMT Bosh kotibi Antoniu Guterrish mazkur qarordan chuqur xavotirda ekanini bildirib, buni xalqaro adolatga berilgan jiddiy zarba deb atadi. Shu bilan birga, dunyoning bir qator yetakchi davlatlari tashqi siyosiy idoralari AQSh rejimining bu harakatiga qarshi ekanliklarini ochiq bildirishdi.

XJS o'z navbatida Vashingtonning harakatlarini keskin qoralab, buni adolat yo'lini to'sishga urinish va xalqaro huquq asoslariga qilingan hujum deb baholadi. Shunga qaramay, sud rahbariyati va xalqaro huquqshunoslar muassasa bosimlarga bardosh berishga urinayotgani hamda o'z faoliyatini davom ettirish uchun muqobil rejalarni ishlab chiqayotganini ta'kidlashmoqda.

Source: www.aljazeera.com