Yaman hududida harbiy harakatlar keskin tus olib, xalqaro miqyosda tan olingan hukumat kuchlari Eron tomonidan qo‘llab-quvvatlanayotgan husiylar harakatiga qarshi keng miqyosli hujum boshladi. Birlashgan Millatlar Tashkilotining Yaman bo‘yicha maxsus elchisi Xans Grundberg Xavfsizlik Kengashidagi chiqishida mamlakat amalda «to‘laqonli urush» holatiga qaytganini ta’kidladi.

Hukumat kuchlari Qizil dengiz kirish qismidagi muhim strategik nuqta bo‘lgan Bob al-Mandeb bo‘g‘ozini qaytarib olishga intilmoqda. Ushbu savdo yo‘li Eron hujumlari tufayli deyarli falaj bo‘lib qolgan Hormuz bo‘g‘oziga muqobil asosiy yo‘nalishga aylangan edi. Shu bilan birga, BMT ma’lumotlariga ko‘ra, avgust oyidan buyon kamida 46 nafar tinch aholi halok bo‘lgan, 130 dan ortig‘i tan jarohati olgan, sentyabrdan beri esa 200 mingdan ortiq kishi o‘z uyini tark etishga majbur bo‘lgan.

Yaman hukumati husiylarga qarshi «Yaman tongi» nomli keng ko‘lamli operatsiya boshlanganini e’lon qildi. Hukumat vakillari bir kecha-kunduzda minglab aniq zarbalar berilganini da’vo qilmoqda. O‘z navbatida, husiylar ham Saudiya Arabistonining Ar-Riyod aeroportiga dron va raketalar orqali zarbalar berib, tinch aholi vakillari halok bo‘lishiga sabab bo‘lgani xabar qilindi.

AQSh rejimi vakillari BMT yig‘ilishida husiylarning harakatlarini qoralab, Tehronni mazkur guruhni qo‘llab-quvvatlashni to‘xtatishga chaqirdi. Biroq tahlilchilarning fikricha, tomonlarning murosaga kelishni istamayotgani va harbiy harakatlarni davom ettirayotgani mintaqadagi gumanitar fojiani yanada chuqurlashtirib, Yaman kelajagini xavf ostida qoldirmoqda.

Source: www.aljazeera.com