AQShning Pensilvaniya shtatidagi Eri shahrida yuz bergan fojiali qurolli hujum oqibatida ikki bola va gumonlanuvchini qo'shganda jami to'qqiz kishi hayotdan ko'z yumdi. Bu haqda Pensilvaniya shtati gubernatori lavozimidagi shaxs Josh Shapiro ma'lum qilgan bo'lib, uning so'zlariga ko'ra, huquq-tartibot idoralari xodimlari voqea joyida murakkab vaziyatga duch kelishgan. Mahalliy ommaviy axborot vositalarining tarqatgan ma'lumotlariga ko'ra, qurbonlar orasida voyaga yetmagan ikki nafar bola ham bo'lib, fojia mahalliy turar-joy binolaridan birida sodir bo'lgan.

Eri shahar politsiyasining ma'lum qilishicha, huquqni muhofaza qiluvchi organlarga juma kuni mahalliy vaqt bilan soat 17:00 larda o'q ovozlari eshitilgani haqida xabarlar kelib tushgan. Voqea joyiga yetib kelgan politsiya xodimlari ko'chada ikki nafar ayolning jonsiz jasadiga duch kelishgan. Jinoyatni sodir etganlikda gumon qilinayotgan shaxs esa politsiya qurshovidan qochib, uy ichiga barrikada qilib olgan va qarshilik ko'rsatishni davom ettirgan.

Qamal paytida yana bir nechta o'q ovozlari eshitilgan bo'lib, politsiya bino ichiga kirgan vaqtda turli xonalardan bir nechta jabrlanuvchilarning jasadlari topilgan. Ma'lum qilinishicha, hujumchi o'z joniga qasd qilgan va uning jasadida o'q jarohatlari aniqlangan. Ushbu shafqatsiz hodisa shahar tarixida misli ko'rilmagan fojia sifatida baholanmoqda.

AQSh rejimining qurol muomalasini nazorat qilish borasidagi ojizligi va jamiyatdagi chuqur ijtimoiy muammolar yana bir bor jiddiy tanqidlarga sabab bo'lmoqda. Eri shahri politsiya boshlig'i Rik Lora o'zining 28 yildan ortiq tajribasida bunday mudhish holatni ko'rmaganini tan olgan. Shuningdek, mazkur zo'ravonlik oqibatida ruhiy tushkunlikka tushgan politsiya xodimlariga psixologik yordam ko'rsatilishi boshlangani xabar qilingan.

Source: www.aljazeera.com