Microsoft korporatsiyasining sobiq rahbari Bill Geyts zamonaviy sunʼiy intellekt texnologiyalari milliardlab insonlar hayotiga mislsiz xavf solishi mumkinligini taʼkidlab, jamoatchilikni yana bir bor ogohlantirdi. Uning NBC News telekanaliga bergan intervyusida bildirishicha, agar mazkur vositalar yovuz niyatli shaxslar qoʻliga oʻtib qolsa, ular bashorat qilib boʻlmaydigan halokatli oqibatlarga olib kelishi ehtimoli yuqori. Geyts ushbu sohani qonunchilik darajasida qatʼiy nazoratga olish zarurligini talab qilmoqda.
Tom’s Guide nashri mazkur bayonotlarni tahlil qilish uchun kiberxavfsizlik va bulutli texnologiyalar boʻyicha taniqli ekspert Devid Lintikumga murojaat qildi. Mutaxassisning fikricha, bir milliard odamning oʻlimiga sabab boʻladigan apokaliptik ssenariyni nazariy jihatdan tasavvur qilib boʻlsa-da, amalda bunday holat yuzaga kelishi uchun bir vaqtning oʻzida koʻplab jiddiy tizimli xatolar sodir boʻlishi kerak. Lintikumning soʻzlariga koʻra, bunday koʻlamdagi fojiaga erishish uchun sunʼiy intellekt muhim infratuzilma, harbiy qurollar, taʼminot zanjirlari hamda biologik tizimlarga toʻgʻridan-toʻgʻri taʼsir oʻtkazish imkoniyatiga ega boʻlishi va eng asosiysi — mutlaqo inson aralashuvisiz mustaqil harakatlana olishi shart.
Shunga qaramay, ekspert texnologiya bilan bogʻliq kundalik xavflarni inkor etmayapti, aksincha, ularning ayrimlari jiddiy ijtimoiy muammolarni keltirib chiqarayotganini tan olmoqda. Xususan, maʼlumotlarning sizib chiqishi, keng tarqalgan firibgarlik holatlari, ishonchsiz dipfeyklar, xato avtomatlashtirish va tarafkash qarorlar qabul qilish kabi muammolar dolzarb boʻlib qolmoqda. Uning asosiy xavotiri — yetarlicha sinovdan oʻtmagan sunʼiy intellekt tizimlarining davlat va korporativ tarmoqlarga shoshilinch ravishda ulanishidir.
Xavflarni minimallashtirish maqsadida Lintikum dasturlarga faqat oʻz vazifasini bajarish uchun zarur boʻlgan minimal vakolatlarni berishni, muhim tizimlarni oʻzaro ajratib ishlatishni va har qanday yuqori xavfli harakatni mutlaqo inson tasdigʻiga bogʻlab qoʻyishni taklif qilmoqda. Shuningdek, mutaxassis shoshilinch oʻchirish tugmasining oʻzi yetarli emasligini, chunki inson muammoni payqaguncha tizim ulkan zarar yetkazib ulgurishini eslatib oʻtdi.
Source: kun.uz