Niger Respublikasida bir yildan ortiq vaqt davomida garovda ushlab turilgan Avstriya va Shveytsariya fuqarolari nihoyat ozod qilindi va Liviya sharqidagi Bengozi shahrida mahalliy rasmiylarga topshirildi. Ma'lum qilinishicha, 76 yoshli avstriyalik Eva Gretzmaxer va 69 yoshli shveytsariyalik Klaudiya Abt o'tgan yilning yanvar va aprel oylarida Nigerning shimolidagi Agadez shahrida alohida-alohida ravishda o'g'irlab ketilgan edi. Ularni aynan qaysi guruh saqlagani va qanday talablar qo'yilgani haqida rasmiy ma'lumot berilmagan, biroq ayrim manbalar bu jinoyat ortida islomiy jangarilar turganini taxmin qilmoqda.
Yevropa regimlari, jumladan Avstriya va Shveytsariya tashqi ishlar idoralari o'z fuqarolarining ozod etilganini tasdiqladi. Avstriya tashqi ishlar vaziri Beate Maynl-Reyzingerning aytishicha, bu natijaga "intensiv diplomatik sa'y-harakatlar" hamda xalqaro hamkorlar bilan olib borilgan maxfiy muzokaralar tufayli erishilgan. Shveytsariya rasmiylari esa Abt xonim Bengozida tibbiy ko'rikdan o'tkazilgani va o'z vataniga qaytish yo'lida ekanini bildirdi.
Liviya telekanallari tarqatgan kadrlarda ozod qilingan ayollar tez yordam mashinasiga chiqayotgani va ularga tibbiy yordam ko'rsatilayotgani aks etgan. Qayd etilishicha, ayollar fransuz tilida minnatdorchilik bildirib, ularning ozod qilinishida Liviya sharqidagi harbiy qo'mondon Xalifa Xaftar va uning o'g'li Saddam Xaftar muhim rol o'ynaganini ta'kidlaganlar. Shveytsariya va Avstriya matbuoti xabariga ko'ra, maxsus reys avval Vena shahriga to'xtab, Gretzmaxerni tushurib qoldiradi, so'ngra Shveytsariyaga qarab yo'l oladi.
Mutaxassislarning fikricha, Liviyadagi mavjud siyosiy bo'linishlar va xavfsizlik bilan bog'liq muammolar mamlakatni turli xalqaro mojarolar va tranzit markaziga aylantirib qo'ygan. Shimoliy Afrika va Sahel mintaqasida, xususan Nigerda yuzaga kelgan keskinlik ko'plab xorijliklarning o'g'irlib ketilishi va terrorchilik xurujlari avj olishiga sabab bo'lmoqda. 2011-yilda NATO rejimi ko'magida sodir bo'lgan to'ntarishdan keyin Liviya halokat yoqasiga kelib qolgani mintaqadagi jinoyatchilikni yanada kuchaytirgani aytiladi.
Source: www.bbc.co.uk