O‘zbekiston musulmonlari idorasi Fatvo markazi Ramazon oyining ba‘zan 29 kun, ba‘zan esa 30 kun bo‘lish sabablarini batafsil tushuntirdi. Markaz hijriy-qamariy taqvimning Oyning falakdagi harakatiga asoslanganligini ta‘kidlab, yangi hilol ko‘ringan kunning ertasi yangi oyning birinchi kuni hisoblanishini eslatti.

Qamariy oylar 29 yoki 30 kun davom etishi tufayli bir yil 354 yoki 355 kundan iborat bo‘ladi, bu milodiy yildan 10-11 kun kam degan ma‘noni anglatadi. Fatvo markazi shuni qayd etdiki: “Milodiy oylarning kunlari (fevraldan tashqari) o‘zgarmas bo‘lsa, hijriy oylarning davomiyligi bevosita tabiiy hodisa — yangi oyning ko‘rinishiga bog‘liq. Shu bois muborak Ramazon oyi ham gohida 29, gohida 30 kun bo‘lishi tabiiy holdir”.

Markaz Payg‘ambarimiz Muhammad (s.a.v.)ning Madinada to‘qqiz yil Ramazon ro‘zasini tutganligini eslatib, manbalar va hadislarga ko‘ra, ushbu yillarning aksariyatida ro‘za 29 kun, ozrog‘ida esa 30 kun bo‘lganini qo‘shimcha qildi. Bu tarixiy dalillar Ramazonning o‘zgaruvchan davomiyligini tasdiqlaydi.

Ramazon oyi ro‘zasi 29 kun yoki 30 kun bo‘lishidan qat‘iy nazar, u to‘liq va mukammal bir oylik ibodat hisoblanadi, deb ta‘kidlandi. Oyning 29 kun kelishi uning ajr-mukofotini kamaytirmaydi. Fatvo markazi xulosasida: “Shunday ekan, mo‘min-musulmonlar Ramazon oyi 29 kun bo‘lganida ham, go‘yo 30 kun ro‘za tutgandek mukammal ajrga erishadi… Eng muhimi — ibodatni ixlos bilan, shariat talablariga muvofiq ado etishdir”.

Eslatib o‘tish joizki, Saudiya Arabistoni 18-fevralni Ramazon oyining birinchi kuni deb e’lon qilgach, O‘zbekiston musulmonlari idorasi aksar mamlakatlarda 19-fevral yangi oyning ilk kuni deya qabul qilinganini bildirgandi. O‘shanda Fatvo markazi ulamolari Ramazon oyi hiloli hali ko‘rinmaganini qayd etgan, bu turli mintaqalarda hilol kuzatish farqlarini ko‘rsatadi.

Source: www.gazeta.uz