Jahon Banki O‘zbekiston transport infratuzilmasini modernizatsiya qilish va sohada kompleks islohotlarni amalga oshirish uchun 200 million dollar ajratishni ma’qulladi. Bankning O‘zbekistondagi vakolatxonasi matbuot xizmati bu haqda xabar berdi. Ushbu mablag‘ Surxondaryo viloyatidagi M41 mintaqaviy avtomobil yo‘lining 91 km qismini rekonstruksiya qilishga yo‘naltiriladi, bu yo‘l O‘zbekistonni Tojikiston, Qirg‘iziston va Afg‘oniston bilan bog‘laydi.

Loyiha doirasida mavjud ikki qatorli yo‘l to‘rt qatorli avtomagistralga kengaytiriladi, bu esa har kuni qariyb 35 000 haydovchi va yo‘lovchining foydalanishiga imkon beradi. Bank ta’kidlashicha, rekonstruksiya yakunlangach, avtomagistralga yondosh hududlarda yashovchi taxminan 550 ming aholi transport xizmatlari va iqtisodiy imkoniyatlardan kengroq foydalana oladi, jumladan biznesni rivojlantirish va yangi ish o‘rinlari yaratish orqali.

Rekonstruksiya ishlari yo‘l qoplamasi sifatini yaxshilash, yo‘l harakati xavfsizligini oshirish va avtobus bekatlarining qulayligini yaxshilashni o‘z ichiga oladi. Shuningdek, suv toshqinlari xavfini kamaytirish uchun 180 ga yaqin ko‘prik va drenaj inshootlarini qurish va rekonstruksiya qilish ko‘zda tutilgan. Bu chora-tadbirlar yo‘l-transport hodisalari va o‘lim holatlari sonini kamaytirishga, yo‘lga ketadigan vaqtni qisqartirishga (aholi punktlaridan tashqarida o‘rtacha tezlik 65 km/soatdan 90 km/soatgacha oshadi) hamda yo‘lovchi va yuk tashishning ishonchliligini oshirishga yordam beradi.

Loyiha, shuningdek, Transport vazirligiga multimodal tashuvlarni rivojlantirish milliy strategiyasini ishlab chiqishda ko‘maklashadi va “O‘zbekiston temir yo‘llari” AJ o‘z biznes-jarayonlarini, jumladan korporativ boshqaruvni mustahkamlash, moliyaviy shaffoflikni oshirish, yo‘lovchi tashishni rejalashtirishni yaxshilash va ekologik, ijtimoiy va korporativ boshqaruv (ESG) amaliyotlarini joriy etish orqali takomillashtiradi.

Source: www.gazeta.uz