O‘zbekiston Prezidenti tomonidan imzolangan farmonga ko‘ra, sog‘liqni saqlash tizimida boshqaruv samaradorligini oshirish va tibbiy xizmatlar sifatini nazorat qilishni kuchaytirish maqsadida bir qator yangi tuzilmalar tashkil etiladi.

Sog‘liqni saqlash vazirligi tarkibida yangi bo‘linmalar paydo bo‘ladi. Xususan, mavjud strategik rivojlanish instituti negizida Aholi salomatligi tahlili ilmiy-tadqiqot markazi tashkil etiladi. Ushbu markaz tibbiy ko‘rsatkichlarni o‘rganish va jamoat salomatligini yaxshilash bo‘yicha yechimlar ishlab chiqish bilan shug‘ullanadi.

Shuningdek, klinik audit inspeksiyasi tashkil etilib, uning hududiy bo‘linmalari tibbiyot muassasalarida xizmat sifatini tekshiradi. Axborot ta’minoti va aholi bilan muloqot uchun kontent-media markaz yaratiladi.

Fuqarolar bilan o‘zaro aloqani kuchaytirish maqsadida autsorsing asosidagi call-markaz va qayta aloqa tizimi joriy etiladi. Bu orqali murojaat, shikoyat va takliflarni qabul qilish, tibbiy yordam sifatini tahlil qilish va muammolarga tezkor javob berish rejalashtirilgan.

2026-yil 1-sentabrdan tibbiyot assotsiatsiyalarining vakolatlari kengaytiriladi. Ular tibbiy yordam standartlarini ishlab chiqish va muhokama qilish, statsionarlar faoliyatini baholash, shuningdek, mustaqil professional ekspertlar sifatida tibbiy kadrlarni sertifikatlash va qayta tayyorlash jarayonlarida ishtirok etadi.

2027-yildan boshlab yirik tibbiyot muassasalari rahbarlari 5 yilgacha bo‘lgan muddatga kontrakt asosida tayinlanadi va ularning faoliyati KPI tizimi orqali baholanadi. KPI ko‘rsatkichlari bajarilmasa, kontrakt muddatidan oldin bekor qilinishi mumkin.

Source: podrobno.uz