O‘zbekistonda fuqarolar va tashkilotlar kartel kelishuvlari hamda reklama qonunchiligi buzilishi haqida ishonchli ma’lumot berganliklari uchun pul mukofoti olishlari mumkin bo‘lgan tartib joriy etilishi rejalashtirilmoqda.
Raqobat va reklama sohasidagi qonunbuzarliklar haqida xabar bergan shaxslarni rag‘batlantirish to‘g‘risidagi hukumat qarori loyihasi jamoat muhokamasiga qo‘yildi. Hujjat raqobatga qarshi kelishuvlarni aniqlash samaradorligini oshirish va iste’molchilar huquqlarini himoya qilishni kuchaytirish maqsadida ishlab chiqilgan.
Loyihaga ko‘ra, fuqarolar va yuridik shaxslar qonunbuzarliklar haqida og‘zaki, yozma yoki elektron aloqa kanallari orqali ma’lumot berishlari mumkin. Majburiy shart – huquqbuzarlik haqida aniq ma’lumot va tasdiqlovchi materiallarni taqdim etish.
Ariza beruvchi haqidagi ma’lumotlar qat’iy maxfiy saqlanishi, murojaat bilan bog‘liq har qanday bosim yoki ta’qib qilishga yo‘l qo‘yilmasligi belgilangan. Huquqbuzarlik fakti tasdiqlangan va jarimalar maxsus fondga tushgan taqdirda, ariza beruvchi pul mukofoti olishi mumkin.
To‘lov miqdori huquqbuzarlik xususiyatiga bog‘liq: raqobatga qarshi kelishuvlarni aniqlash uchun undirilgan jarima summasining 3 foizigacha, lekin 100 BHMdan oshmasligi; reklama sohasidagi qonunbuzarliklar uchun esa 10 foizgacha, lekin 10 BHMdan oshmasligi ko‘zda tutilgan.
Hukumat ushbu mexanizm jamoatchilik nazoratini kuchaytirishi, bozorni shaffofroq qilishi va vijdonsiz raqobatga qarshi kurashishga yordam berishiga umid qilmoqda.
Avvalroq, O‘zbekiston Soliq qo‘mitasi Soliq hamkor tizimi orqali soliq qonunchiligi buzilishi haqida xabar bergan fuqarolarga 3 milliard so‘m mukofot to‘lagani xabar qilingan edi.
Source: podrobno.uz