O‘zbekiston Prezidenti Shavkat Mirziyoyevning shaxsiy topshirig‘i bilan 2019-yil 30-may kuni birinchi gumanitar operatsiya amalga oshirildi. Urush hududidagi Suriyadan 156 nafar O‘zbekiston fuqarosi, asosan ayollar va bolalar vatanga qaytarildi.

Keyingi yillarda “Mehr-2” (2019-yil oktabr), “Mehr-3” (2020-yil dekabr), “Mehr-4” (2021-yil fevral) operatsiyalari davomida Iroq, Suriya va Afg‘onistondan o‘nlab ayollar va bolalar olib kelindi.

“Mehr-5” operatsiyasining yakuniy bosqichi 2021-yil aprelida bo‘lib o‘tdi: Suriyadan 92 kishi – 24 ayol va 68 bola vatanga qaytarildi.

Hammasi bo‘lib “Mehr” operatsiyalari natijasida 530 dan ortiq kishi qaytarildi, ularning taxminan 75 foizi bolalardir. Barcha repatriantlar hujjatlar bilan ta’minlangan. Mojaro hududida tug‘ilgan har bir bolaga O‘zbekiston Respublikasi tug‘ilganlik haqidagi guvohnomasi berilgan.

Qaytarilgan bolalar maxsus emas, oddiy maktablarda o‘qimoqda. Hozirda 10 nafarga yaqin repatriant oliy ta’lim olmoqda, 9 nafar bola respublika va viloyat fan olimpiadalari g‘olibi va sovrindori bo‘lgan.

Source: kun.uz