O‘zbekistonda issiq suv va issiqlik ta’minoti tariflari oshirilganda, aholi uchun avans to‘lovlari bo‘yicha eski tariflarning amal qilish muddati 12 oydan 2 oyga qisqartirildi. Bu ikki oylik muddat tarif oshirilgan kundan emas, balki to‘lov amalga oshirilgan kundan boshlab hisoblanadi. Yuridik shaxslar uchun avans hisobiga eski tarifni saqlash nazarda tutilmagan.

Ko‘p qavatli uylarda issiqlik ta’minoti xizmatlari ko‘rsatish qoidalariga o‘zgartirishlar kiritildi. Unga ko‘ra, tariflar oshirilganda jismoniy shaxslar avans to‘lovlari doirasida to‘lov amalga oshirilgan kundan boshlab 2 oydan ortiq bo‘lmagan muddatda qo‘shimcha to‘lovlardan ozod qilinadi. Bu haqda Veolia Energy Tashkent kompaniyasi matbuot xizmati xabar berdi. Ilgari bu muddat 12 oyni tashkil qilgan.

Yangi tartib gaz va elektr energiyasi uchun mavjud tartibdan qanday farq qiladi? Elektr energiyasi va tabiiy gaz tariflari oshirilganda, abonent balansidagi qoldiq doirasida eski tariflar bo‘yicha hisob-kitob 2 oygacha amalga oshiriladi. Bunda avans to‘lovi yangi tariflar kuchga kirgunga qadar amalga oshirilgan bo‘lishi kifoya.

Issiqlik ta’minotida esa aniq to‘lov sanasi muhim. Eski tarif saqlanadigan ikki oylik muddat tarif oshirilgan kundan emas, balki avans to‘lovi kiritilgan kundan boshlanadi. Shuning uchun issiqlik iste’molchilari uchun xizmatni tarif oshishidan bir kun oldin to‘lash foydaliroq, chunki bu ikki oylik davrdan to‘liq foydalanish imkonini beradi.

Bundan tashqari, gaz va elektr tariflari oshirilganda avans doirasida eski tarif jismoniy shaxslar uchun 2 oygacha, yuridik shaxslar uchun esa 1 oygacha amal qiladi. Issiqlik ta’minotida esa yuridik shaxslar uchun bunday imtiyozli davr nazarda tutilmagan; ikki oylik muddat faqat jismoniy shaxslarga tegishli.

Toshkentda issiqlik ta’minoti va issiq suv tariflari oxirgi marta 2025-yil noyabr oyida oshirilgan edi – aholi uchun 15%, yuridik shaxslar uchun 40%.

Source: kun.uz