O‘zbekiston terma jamoasining jahon chempionati pley-off bosqichiga chiqish imkoniyati sezilarli darajada yomonlashdi. Bunga Ekvador terma jamoasining E guruhida Germaniyani 2:1 hisobida mag‘lub etishi sabab bo‘ldi.

Ekvador ushbu g‘alaba bilan 4 ochko to‘pladi va guruhda uchinchi o‘rinni egalladi. Bu esa uchinchi o‘rinlilar reytingida uning o‘rnini ko‘tarib, qo‘shimcha yo‘llanmalar uchun kurashni yanada qizg‘inlashtirdi.

Jahon chempionati reglamentiga ko‘ra, pley-offga har bir guruhdan ikki eng yaxshi jamoa, shuningdek, uchinchi o‘rinni egallagan sakkizta eng yaxshi jamoa chiqadi. O‘zbekiston Kolumbiya va Portugaliyaga mag‘lub bo‘lib, hali ochko to‘plamagan va K guruhida birinchi ikki o‘ringa chiqa olmaydi.

Fabio Kannavaro boshchiligidagi jamoa uchun yagona stsenariy – so‘nggi turda DR Kongoni mag‘lub etish va boshqa guruhlardagi natijalarni kutish. Hozirgi vaziyatda O‘zbekiston raqibini kamida to‘rtta to‘p farqi bilan yutishi kerak, bu esa to‘plar farqini yaxshilab, eng yaxshi uchinchi o‘rinlar qatoriga kirish imkoniyatini saqlab qoladi.

DR Kongo ikki turdan so‘ng 1 ochkoga ega: jamoa Portugaliya bilan durang o‘ynagan va Kolumbiyaga mag‘lub bo‘lgan. Hal qiluvchi O‘zbekiston – DR Kongo uchrashuvi 28-iyun kuni Atlantada bo‘lib o‘tadi. O‘yin Toshkent vaqti bilan soat 04:30 da boshlanadi.

Avvalroq DR Kongo murabbiyi Sebastyen Desabr O‘zbekistonga qarshi o‘yin oldidan “Bizga durang yetarli emas” deb aytgan edi. Uning so‘zlariga ko‘ra, Kolumbiyaga mag‘lubiyatdan so‘ng kongoliklar tavakkal qilishga majbur.

Source: podrobno.uz