Raqobatni rivojlantirish va iste'molchilar huquqlarini himoya qilish qo'mitasi xabar berishicha, so'nggi paytlarda aholi bilan ishlaydigan tashkilotlarning qisqa raqamlari doimiy ravishda band bo'lib qolmoqda. Fuqarolar operator bilan bog'lanish uchun uzoq kutishga majbur bo'lmoqda, ko'plab qo'ng'iroqlar javobsiz qolmoqda, ba'zi hollarda esa aloqa ulanishdan oldin uzilib qolmoqda.

Qo'mita ma'lumotlariga ko'ra, mobil telefonlardan eng ko'p qo'ng'iroqlar elektr ta'minoti, gaz va suv ta'minoti xizmatlari, shuningdek, hayotiy muhim kommunal xizmatlar ko'rsatadigan boshqa tashkilotlarning qisqa raqamlariga amalga oshirilmoqda. Ayrim hollarda javob kutish vaqti 10-30 daqiqagacha yetmoqda.

Xabar qilinishicha, so'nggi vaqtlarda gaz ta'minoti bo'yicha murojaatlar soni 4,5 baravarga, maishiy chiqindilarni olib chiqish bo'yicha 2,4 baravarga, ichimlik suvi ta'minoti va qurilish xizmatlari bo'yicha esa 1,2 baravarga oshgan.

Qo'mita, shuningdek, ko'plab kol-markazlarning faoliyati yagona normativ-huquqiy hujjat bilan tartibga solinmaganligini ta'kidlaydi. Shu munosabat bilan qo'mita Raqamli texnologiyalar vazirligiga issiq liniyalar ishidagi texnik va tashkiliy kamchiliklarni bartaraf etish bo'yicha takliflar yubordi.

Xususan, Vazirlar Mahkamasining 790-sonli qarori bilan tasdiqlangan kol-markazlar samaradorligini baholash tartibini aholiga xizmat ko'rsatadigan barcha tashkilotlarga tatbiq etish taklif qilinmoqda.

Shuningdek, aniqlangan kamchiliklar uchun shaxsiy javobgarlik belgilash va baholash natijalarini ochiq e'lon qilish taklif etilmoqda.

Source: www.uznews.uz