Uzbekistan Airports kompaniyasi Airport Carbon Accreditation xalqaro dasturiga qo‘shildi. Ushbu dastur doirasida aeroportlar uglerod chiqindilarini boshqarish va kamaytirish bo‘yicha faoliyatini baholaydi va tasdiqlaydi.

Samarqand, Urganch, Namangan, Farg‘ona, Nukus, Termiz, Qarshi va Navoiy xalqaro aeroportlari 1-darajali akkreditatsiyani oldi. Bu ularning operatsion chiqindilarni inventarizatsiya qilish va mustaqil tekshirishdan o‘tkazganligini tasdiqlaydi.

Toshkent aeroporti esa 2-darajali akkreditatsiyaga ega bo‘ldi. Bu bosqich operatsion chiqindilarni kamaytirish choralarini joriy etishni nazarda tutadi.

Uzbekistan Airports boshqaruvi raisi Javlonbek Umarxo‘jayev: “Airport Carbon Accreditation akkreditatsiyasiga erishish Uzbekistan Airports aeroportlari tarmog‘ining barqaror transformatsiyasidagi muhim bosqichdir. Bu tan olinish biz uchun katta ahamiyatga ega bo‘lsa-da, biz uni barqaror rivojlanishni mustahkamlash va ekologik ko‘rsatkichlarni yaxshilash bo‘yicha uzoq muddatli yo‘lning boshlanishi deb bilamiz”, dedi.

Eslatib o‘tamiz, avvalroq Uzbekistan Airports 2026-yil birinchi choragi yakunlari bo‘yicha yo‘lovchi oqimi, reyslar va yuk tashish hajmi o‘sgani haqida xabar bergan edi.

Source: podrobno.uz