️ G‘ijduvon tuman jinoyat ishlari bo‘yicha sudida 30 yoshli M.M.ga nisbatan yollanma askarlik (nayemniklik) ayblovi bilan ish ko‘rib chiqildi. Bu haqda UzNews.uz muxbiri sud hukmiga asoslanib xabar beradi.

️ Ish materiallariga ko‘ra, sudlanuvchi 2024-yilda Rossiyaga ishlash uchun borgan. Bir kuni u tanishi bilan politsiya xodimlari tomonidan to‘xtatilib, bo‘limga olib ketilgan. Uning so‘zlariga ko‘ra, ular va politsiyachilar o‘rtasida mojaro kelib chiqqan va natijada janjal sodir bo‘lgan.

️ Unga politsiya xodimiga kuch ishlatgani uchun qamoq jazosi tahdid qilinayotgani aytilgan. Shu bilan birga, unga Rossiya va Ukraina o‘rtasidagi urushda qatnashish uchun shartnoma imzolash taklif qilingan. Shu sababli, M.M.ning ta’kidlashicha, u shartnomani imzolashga majbur bo‘lgan.

️ O‘zbekiston fuqarosi Belouska shahridagi harbiy qismga yuborilib, u yerda jangovar tayyorgarlikdan o‘tgan. Jangovar harakatlar paytida u yarador bo‘lgan va shifoxonaga yotqizilgan.

️ 2026-yil fevral oyida u ta’til olib, O‘zbekistonga qaytgan va kelgan zahoti huquq-tartibot organlariga o‘z ixtiyori bilan xabar bergan.

️ Sud M.M.ni O‘zbekiston Respublikasi Jinoyat kodeksining 154-moddasi 1-qismida (Yollanma askarlik) nazarda tutilgan jinoyatni sodir etganlikda aybdor deb topdi. Unga 3 yil ozodlikdan mahrum qilish jazosi tayinlandi.

Source: uznews.uz