O‘zbekiston Oliy sudi 13-iyul holatiga ko‘ra internetdagi diniy ekstremistik, terroristik va aqidaparastlik g‘oyalari bilan yo‘g‘rilgan deb topilgan manba va kontentlar ro‘yxatini yangiladi. Ushbu ro‘yxatga kiritilgan materiallarni O‘zbekiston hududiga olib kirish, tayyorlash, saqlash, tarqatish va namoyish etish taqiqlangan.

Yangilangan ro‘yxatda jami 1915 ta manba va kontent mavjud. Bu avvalgi versiyaga nisbatan sezilarli o‘sishdir. So‘nggi yangilanish aprel oyida bo‘lib, unda 1800 dan ortiq kanal, sahifa va materiallar tilga olingan edi. Yil davomida bu ro‘yxat uchinchi marta yangilanmoqda (avvalgi yangilanishlar 10-yanvar va aprelda bo‘lgan).

Oliy sud xabarida aytilishicha, ro‘yxat diniy ekstremizm va terrorizmga qarshi kurashish maqsadida tuzilgan. Sud fuqarolarni, ayniqsa yoshlar va ota-onalarni ogohlantirib, “Diniy aqidaparastlik, ekstremizm va terrorizm tuzog‘iga tushib qolishdan doimo saqlaning. Ular hayotingiz va orzularingizni barbod qilishiga aslo yo‘l qo‘ymang”, degan murojaat bilan chiqdi.

Ushbu chora O‘zbekistonda internet mazmunini nazorat qilish va radikal g‘oyalar tarqalishining oldini olish bo‘yicha davlat siyosatining bir qismidir. Rasmiylarning ta’kidlashicha, bunday materiallar yoshlar orasida ekstremistik qarashlarni keltirib chiqarishi mumkin.

Source: www.gazeta.uz