O‘zbekiston, Toshkent – AN Podrobno.uz. 1 iyuldan boshlab O‘zbekistondagi barcha nodavlat maktablar, bolalar bog‘chalari va o‘quv markazlari binolarining ichki va tashqi qismlariga videokuzatuv tizimlarini o‘rnatishi shart. Kameralar tunu-kun yozib olishi, tasvirni real vaqt rejimida uzatishi va ovozni yozib olishi kerak.

Tegishli o‘zgartirishlar Vazirlar Mahkamasining 2026-yil 21-maydagi qarori bilan faoliyatning ayrim turlarini litsenziyalash tartibi to‘g‘risidagi yagona nizomga kiritildi.

Yangi talablarga ko‘ra, kameralardagi yozuvlar kamida olti oy saqlanishi lozim. Ushbu talablarning bajarilishini nazorat qilish Maktabgacha va maktab ta’limi vazirligi zimmasiga yuklatilgan.

Yangi qoidalar allaqachon faoliyat yuritayotgan xususiy ta’lim muassasalariga ham, endi litsenziya olayotganlarga ham taalluqli. Talablarga rioya qilmaslik “Litsenziyalash, ruxsat berish va xabardor qilish tartib-taomillari to‘g‘risida”gi qonunga muvofiq litsenziyani bekor qilish uchun asos bo‘lishi mumkin.

Davlat maktablarida videokuzatuv tizimlari bir necha yildan beri joriy qilinmoqda. Xususan, Toshkent hokimining 2025-yil 29-avgustdagi qarori bilan poytaxtdagi barcha maktablarning 10–11-sinf xonalariga davomat va ta’lim sifatini nazorat qilish uchun kameralar o‘rnatilgan.

Avvalroq, O‘zbekiston Ijtimoiy himoya agentligi bolalarga nisbatan zo‘ravonlik uchun javobgarlikni kuchaytirish maqsadida Jinoyat va Jinoyat-protsessual kodekslariga o‘zgartirishlar kiritishni taklif qilgani xabar qilingan edi.

Source: podrobno.uz