Avvalroq, Toshkent hokimiyati pullik toʻxtash joylarini toʻlamaganlik uchun maʼmuriy javobgarlik belgilashni nazarda tutuvchi qonun loyihasini ishlab chiqqani haqida xabar berilgan edi. Jarima miqdori 2 BHM (hozirda 824 000 soʻm, 1 sentyabrdan 880 000 soʻm) etib taklif qilingan.
Oʻzbekiston Xalq-demokratik partiyasi deputatlari ushbu loyihani qabul qilib boʻlmasligini bildirgan bayonot bilan chiqdi. Ularning taʼkidlashicha, Konstitutsiyaning 98-moddasiga muvofiq, Toshkent hokimiyati qonunchilik tashabbusi huquqiga ega subʼyektlar qatoriga kirmaydi. Kodekslarga oʻzgartirish kiritish toʻgʻrisidagi qonun loyihalari faqat Konstitutsiyada koʻrsatilgan subʼyektlar tomonidan kiritilishi mumkin.
Bundan tashqari, xususiy pullik toʻxtash joyi operatorining xizmatlari uchun toʻlov boʻyicha fuqarolik-huquqiy majburiyatni bajarmaganlik uchun maʼmuriy javobgarlik joriy etish qonunchilikka zid. Fuqarolik kodeksiga koʻra, pullik toʻxtash joyi xizmatlari uchun toʻlash majburiyati foydalanuvchi va operator oʻrtasidagi munosabatlardan kelib chiqadi. Huquqiy tabiatiga koʻra, bunday munosabatlar fuqarolik-huquqiy hisoblanadi.
«Bunday vaziyatda maʼmuriy javobgarlikni joriy etish oʻrniga qonunchilikda nazarda tutilgan fuqarolik-huquqiy mexanizmlarni qoʻllash, yaʼni toʻxtash joyi operatori qarzdorlikni sud tartibida undirishi kerak», — dedi deputatlar.
Shuningdek, maʼmuriy javobgarlik choralari (jarimalar) davlat organlari tomonidan faqat davlat va jamoat manfaatlarini himoya qilish maqsadida qoʻllanishi mumkinligi taʼkidlandi. Tijorat tashkiloti daromadlarini undirishni taʼminlash uchun davlat majburlovidan foydalanish huquqiy davlat tamoyillariga zid.
Deputatlar pullik toʻxtash joylarini haydovchilarning atigi 2–3 foizi toʻlayotgani haqidagi daʼvo jamoatchilikda jiddiy shubha uygʻotayotganiga eʼtibor qaratdi. OʻXDP avvalroq taʼkidlaganidek, hokimiyat pullik toʻxtash joylaridan tushumlar va davlat byudjetiga oʻtkazilgan mablagʻlar hajmi toʻgʻrisida maʼlumotni hozirgacha oshkor qilmagan.
«Oʻzbekiston Xalq-demokratik partiyasi ijro etuvchi hokimiyat organlarini jarima va jazo joriy etish bilan emas, balki aholi uchun munosib sharoitlar yaratish bilan shugʻullanishga chaqiradi», — dedi deputatlar.
Source: uznews.uz