Toshkent viloyati Zangiota tumanida huquqni muhofaza qilish organlari va qutqaruvchilar yuz berishi mumkin bo‘lgan fojiadan saqlab qolishdi. Savdo majmuasining 10-qavatiga chiqib, sakrashga tayyorlanayotgan erkakni xavfsiz tarzda binodan tushirishga muvaffaq bo‘lishdi.

Voqea joyidan olingan videolar avvalroq ijtimoiy tarmoqlarda tarqaldi. Kadrlarda bir kishi balandlikda turgani va ko‘p qavatli binodan sakrashga uringani ko‘rinib turardi.

Viloyat IIB ma’lumotlariga ko‘ra, hodisa 14-iyun kuni soat 22:20 atrofida sodir bo‘lgan. Xabar kelib tushgach, voqea joyiga tuman ichki ishlar bo‘limi, prokuratura va favqulodda vaziyatlar bo‘limi xodimlari yetib kelishgan.

Mutaxassislar erkak bilan aloqa o‘rnatib, uni halokatli qadamdan voz kechishga ishontirishdi. U savdo majmuasining 10-qavatidan hech qanday jarohat olmagan holda tushirildi.

Keyinchalik ma’lum bo‘lishicha, qutqarilgan shaxs Qashqadaryo viloyati Chiroqchi tumanidagi “Chambil” mahallasining 36 yoshli fuqarosi bo‘lgan. Huquqni muhofaza qilish organlari ma’lumotlariga ko‘ra, erkak psixonevrologik dispanserdan hisobda turadi.

Voqea yuzasidan zarur hujjatlar rasmiylashtirildi. Hozirda erkak zarur yordam olish uchun ixtisoslashtirilgan tibbiy muassasaga yuborilgan.

Eslatib o‘tamiz, avvalroq Farg‘ona viloyatida ekoinspektorlar voyaga yetmagan qizni o‘z joniga qasd qilishdan qutqarib qolishgandi.

Source: podrobno.uz