Shavkat Mirziyoyev payshanba kuni o‘tkazilgan videoselektor yig‘ilishida mahalla raislariga bo‘sh yer uchastkalarini xususiy bog‘chalar, maktablar, klinikalar va sport ob’ektlari qurish uchun auktsionga qo‘yish huquqini berishni taklif qildi.

Davlat rahbari misol sifatida Farg‘ona viloyatidagi “Yangi Quva” mahallasini keltirdi. Bu yerda bog‘cha yetishmasligi sababli 50 nafar bola qo‘shni mahalladagi maktabgacha ta’lim muassasasiga borishga majbur, shu bilan birga hududda 70 sotix bo‘sh yer uchastkasi mavjud.

Shu munosabat bilan prezident mahalla raislariga bunday yer uchastkalarini ijtimoiy loyihalarni amalga oshirish uchun mustaqil ravishda auktsionga qo‘yish huquqini berishni taklif qildi.

Bundan tashqari, shu mahalla misolida aholi bandligini ta’minlashning yangi tartibi taqdim etildi. Mahalla raisi ishsizlardan kim tadbirkorlik bilan shug‘ullanishni xohlashi, kimga kredit, uskuna yoki yer uchastkasi kerakligini aniqlab, so‘ngra mahalla bankiriga aniq vazifalar qo‘yishi kerak. Shuningdek, ishsiz fuqarolarning tomorqa yerlarida gul ko‘chatlari yetishtirish uchun yengil issiqxonalar qurish misoli keltirildi.

Source: uznews.uz