Toshkent viloyatida 21 iyuldan boshlab Toshkent va Nurafshonni bog‘lovchi D-002 avtomobil yo‘lining bir qismi vaqtincha yopiladi.

Yo‘l harakati xavfsizligi boshqarmasi xabariga ko‘ra, cheklov 4-9 kilometr oralig‘ida – yangi qurilayotgan ko‘prikdan “Avangard” mahallasigacha bo‘lgan qismda joriy etiladi. Bunga yo‘l qurilish ishlari sabab bo‘lgan.

YXBB mutasaddilari ta’kidlashicha, yo‘lning yopilishi qurilish ishlarini xavfsiz o‘tkazish va yo‘l harakati qatnashchilarining xavfsizligini ta’minlash uchun zarur.

Haydovchilarga marshrutni oldindan rejalashtirish, aylanma yo‘llardan foydalanish, vaqtinchalik yo‘l belgilari va yo‘l xizmati xodimlarining ko‘rsatmalariga rioya qilish tavsiya etiladi.

Source: podrobno.uz