Toshkentda anomal issiq kunlarda shahar aholisi yana zamonaviy avtobus bekatlari muammosini ko‘tardi. Ularning fikricha, yangi bekatlar jazirama quyoshdan deyarli himoya qilmaydi.

Munozaraga sabab “Iste’molchi.uz” guruhidagi e’lon bo‘ldi. Muallif Shimoliy vokzal yonidagi bekatni ko‘rsatib, deyarli 50 darajali jaziramada transport kutish uchun yaroqsiz deb atadi.

Muallifning so‘zlariga ko‘ra, bekat faqat soyabondan iborat bo‘lib, yo‘lovchilarni quyoshdan deyarli himoya qilmaydi. U shaharda bunday konstruksiyalar ko‘payib borayotganini, fuqarolarning ko‘plab shikoyatlariga qaramay, bu holat davom etayotganini ta’kidladi.

“Keksalar, bolalar har kuni mana shunday bekatlarda, besh daqiqa emas, uzoq vaqt turishadi. Ko‘chada deyarli 50 daraja. Bunday bekatlarni kim o‘ylab topdi?” — deb yozgan muallif.

E’lon keng muhokamaga sabab bo‘ldi. Ko‘plab foydalanuvchilar muallifni qo‘llab-quvvatlab, zamonaviy bekat pavilonlari quyosh, yomg‘ir va shamoldan yomon himoya qilishini bildirdi. Ba’zi foydalanuvchilar Toshkentda ommaviy ravishda buzilayotgan eski bekatlarni eslab, ular yopiq devorlari va skameykalari tufayli ancha yaxshi himoya qilganini ta’kidladi.

Izohlarda loyihachilar va shahar hokimiyatiga savollar ham bildirildi. “Bunday bekatlarni jamoat transportidan hech qachon foydalanmagan kishi o‘ylab topgan”, — deb yozgan bir foydalanuvchi.

Eslatib o‘tamiz, O‘zbekiston Ekologik partiyasi Toshkentda jamoat transporti bekatlarini jihozlashga yondashuvni qayta ko‘rib chiqishni va yozgi jaziramada avtobus kutishni qulayroq qiladigan “yashil bekatlar” pilot loyihasini ishga tushirishni taklif qilgan edi.

Source: podrobno.uz