So'nggi kunlarda Toshkentda kuzatilayotgan anomal issiq havo tufayli fuqarolar ijtimoiy tarmoqlarda jamoat transportidagi konditsionerlarning ishlamayotganidan shikoyat qilmoqda.

“Toshshahartransxizmat” AJ matbuot xizmati ma'lumotiga ko'ra, hozirda yo'nalishlarga har kuni Mercedes-Benz, SAZ LE-60, MAN, Yutong va King Long markalaridagi 1672 ta avtobus va elektrobus chiqarilmoqda.

Shu bilan birga, yo'nalishlarda ishlayotgan barcha 102 ta Mercedes-Benz avtobusi, 272 ta MAN avtobusidan 100 tasi va 201 ta SAZ LE-60 avtobusidan 88 tasi zavod tomonidan salqinlash tizimi bilan jihozlanmagan.

Xitoyda ishlab chiqarilgan Yutong va King Long avtobuslari va elektrobuslaridagi konditsioner tizimlariga anomal yuqori havo harorati, quyosh nurlarining to'g'ridan-to'g'ri salonga ta'siri, bekatlarda eshiklarning tez-tez ochilishi va yopilishi hamda yo'lovchilarning ko'pligi qo'shimcha yuk hosil qilmoqda.

“Bunday ekstremal sharoitda hatto to'liq soz konditsioner tizimlari ham o'zining nominal sovutish quvvatini to'liq ta'minlay olmasligi mumkin”, deyiladi xabarda.

Ta'kidlanishicha, anomal yozgi jazirama davrida konditsionerlarning sovutish samaradorligining pasayishi ko'p hollarda uskunaning nosozligi bilan emas, balki sovutish tizimining ekstremal yuqori harorat va issiqlik almashinuvi samaradorligining pasayishi sharoitida ishlashining tabiiy texnik xususiyati bilan bog'liq.

“Toshshahartransxizmat” AJ kompaniya yo'lovchilar uchun qulay sharoit yaratish uchun barcha sa'y-harakatlarni amalga oshirayotganini va ob-havo sharoiti tufayli yuzaga kelgan vaqtinchalik noqulayliklarni tushunish bilan qabul qilishni so'ragan.

Source: uznews.uz