Prezident ishtirokida dushanba kuni ichimlik suvi ta’minoti va kanalizatsiya xizmatlarini yanada takomillashtirishga bag‘ishlangan taqdimot bo‘lib o‘tdi. Unda suv ta’minoti korxonalarining moliyaviy barqarorligini ta’minlash masalalari muhokama qilindi.

Davlat rahbari mavjud tariflar bilan xizmatlarning haqiqiy tannarxini to‘liq qoplay olmaslik va hududlar o‘rtasidagi katta farqlar tufayli sohaning investitsion jozibadorligi pasayayotganiga e’tibor qaratdi.

Shu munosabat bilan ichimlik suvini ishlab chiqarish va iste’molchilarga yetkazib berish funksiyalarini ajratish, shuningdek, magistral suv ta’minoti korxonasini tashkil etish taklif qilindi. U hududiy korxonalarga ichimlik suvini yagona ulgurji tarif bo‘yicha yetkazib beradi.

Ichimlik suvi va kanalizatsiya xizmatlari tariflarini shaffof va iqtisodiy asoslangan mezonlar asosida belgilash uchun Idoralararo tarif komissiyasini tuzish, shuningdek, 2027 yil 1 apreldan boshlab byudjet tashkilotlari uchun yagona tarifni joriy etish vazifalari qo‘yildi.

Prognozlarga ko‘ra, 2030 yilga borib demografik va iqtisodiy o‘sish natijasida mamlakatda ichimlik suvi iste’moli hozirgi 941 million kub metrga qo‘shimcha 230 million kub metrga oshadi, bu esa suv resurslarini aniq hisobga olish va yo‘qotishlarni kamaytirishni taqozo etadi.

Shu munosabat bilan iste’molchilar bilan hisob-kitoblarni to‘liq onlayn rejimga o‘tkazish, shahar va tuman markazlaridagi barcha iste’molchilarni masofaviy ma’lumot uzatish funksiyasiga ega zamonaviy suv hisoblagichlari bilan jihozlash vazifalari qo‘yildi.

Prezident, shuningdek, suv ta’minoti inshootlari va tarmoqlarining raqamli xaritasini yaratish, shuningdek, boshqaruv tizimiga SCADA, GIS, telemetriya va yagona billing tizimini keng joriy etish orqali suv yo‘qotishlarini 35 foizdan 25 foizga kamaytirishni topshirdi.

Source: uznews.uz