O‘zbekiston, Toshkent – Podrobno.uz. Birlashgan Millatlar Tashkiloti Bosh Assambleyasi O‘zbekiston Prezidenti Shavkat Mirziyoyev tomonidan ilgari surilgan “Ijtimoiy rivojlanishni jadallashtirishda parlamentlarning rolini kuchaytirish to‘g‘risida”gi rezolyutsiyani qabul qildi. Hujjat dunyoning barcha mintaqalarini ifodalovchi 61 davlat tomonidan qo‘llab-quvvatlandi.
Rezolyutsiya davlatlarni parlamentlarni BMTning 2030 yilgacha bo‘lgan barqaror rivojlish kun tartibini amalga oshirishga faolroq jalb etishga chaqiradi. Hujjatda parlamentlar qonunchilikni takomillashtirish, ijtimoiy himoya tizimlarini rivojlantirish, qashshoqlikni qisqartirish, munosib bandlikni ta’minlash, ta’lim olish imkoniyatlarini kengaytirish va ijtimoiy integratsiyani mustahkamlashda muhim rol o‘ynashi ta’kidlangan.
Shuningdek, rezolyutsiya ayollar va yoshlarning parlament faoliyatidagi ishtirokini kengaytirish, ijtimoiy muammolarni hal qilishda raqamli texnologiyalardan foydalanish, xalqaro hamkorlikni rivojlantirish va rivojlanayotgan mamlakatlarni qo‘llab-quvvatlashni nazarda tutadi.
Bu natijalar xalqaro parlamentlararo muloqotni rivojlantirish bo‘yicha izchil ishlarning natijasidir. So‘nggi yillarda Oliy Majlis Senati xalqaro parlament maydonlarida faol ishtirok etib, O‘zbekiston tashabbuslarini Parlamentlararo Ittifoq, BMT tuzilmalari va boshqa nufuzli tashkilotlar doirasida ilgari surmoqda.
Navbatdagi rezolyutsiya parlamentlarning roliga yangi yondashuvni taklif qiladi. Hujjatda qonun chiqaruvchi organlar oldiga qashshoqlikni qisqartirish, ijtimoiy himoyani kuchaytirish, sifatli ta’lim va munosib bandlikni ta’minlash, ayollar va yoshlarning imkoniyatlarini kengaytirish, shuningdek Barqaror rivojlanish maqsadlarini amalga oshirish vazifalari qo‘yilgan.
Hujjatda alohida Toshkentda Parlamentlararo Ittifoqning 150-Assambleyasi o‘tkazilgani va ijtimoiy rivojlanish va ijtimoiy adolat manfaatlari yo‘lida parlament harakatlari to‘g‘risidagi Toshkent deklaratsiyasi qabul qilingani olqishlanadi.
Rezolyutsiya, shuningdek, davlatlarga parlamentlarni Barqaror rivojlanish maqsadlariga erishish bo‘yicha ixtiyoriy milliy sharhlarni tayyorlashga faolroq jalb etishni, milliy majburiyatlarning bajarilishi ustidan parlament nazoratini kuchaytirishni, fuqarolik jamiyati bilan o‘zaro hamkorlikni kengaytirishni va milliy statistika tizimlarini takomillashtirishni tavsiya qiladi.
O‘zbekistonning BMTdagi Doimiy vakolatxonasida ta’kidlanganidek, hujjatning qabul qilinishidan oldin bir qator rasmiy maslahatlashuvlar va ikki tomonlama muzokaralar o‘tkazilib, matnni kelishish va tashkilotga a’zo davlatlarning keng qo‘llab-quvvatlashiga erishish imkonini berdi.
Source: podrobno.uz