O‘zbekiston, Toshkent – Podrobno.uz. Davlat xavfsizlik xizmati xodimlari "Toshkent-Aero" ixtisoslashtirilgan bojxona kompleksi mutaxassislari bilan hamkorlikda O‘zbekistonga yirik partiya sintetik giyohvand moddalarni olib kirishga urinishning oldini oldi. Noqonuniy muomaladan 4,4 kilogramm mefedron olib qo‘yildi.

Operatsiya "Xavfsiz va sog‘lom mamlakat" operativ-profilaktik tadbirlari doirasida o‘tkazildi.

DXX ma'lumotlariga ko‘ra, giyohvand moddalarni olib kirishga urinayotgan shaxs Qozog‘iston fuqarosi bo‘lib, u Bangkok – Sharja – Toshkent reysi bilan kelgan. Uning qo‘l yukini ko‘zdan kechirish vaqtida huquq-tartibot xodimlari sakkiz xil shirinlik o‘ramida va beshta plastik idishda yashirilgan sintetik giyohvand moddani aniqladi. Olib qo‘yilgan mefedronning umumiy og‘irligi 4,4 kilogrammni tashkil etdi.

Keyingi tezkor tadbirlar davomida Yangiyo‘l shahrida yashovchi fuqaro ushlandi. Tergov versiyasiga ko‘ra, ushlangan shaxs giyohvand moddalarni Toshkentdagi mehmonxonalardan birida aynan shu fuqaroga topshirishi kerak bo‘lgan. Buyurtma taqiqlangan moddalarni sotuvchi internet-do‘kon administratori tomonidan berilgan.

Mahalliy fuqaroni shaxsiy ko‘zdan kechirish vaqtida undan pnevmatik to‘pponcha ham topilib, belgilangan tartibda olib qo‘yildi.

Ushbu fakt bo‘yicha Jinoyat kodeksining 246-moddasi 2-qismi bilan jinoyat ishi qo‘zg‘atildi. Gumonlanuvchilarga nisbatan qamoq ehtiyot chorasi qo‘llanildi. Tergov harakatlari davom etmoqda.

Source: podrobno.uz