O‘zbekistonda fuqarolar va kompaniyalarni yashil hududlar yaratishda ishtirok etishini rag‘batlantirishning yangi tizimi joriy etilishi mumkin. Tegishli qaror loyihasi jamoat muhokamasiga qo‘yildi.

Hujjat Milliy ekologiya va iqlim o‘zgarishi qo‘mitasi tashabbusi bilan ishlab chiqilgan bo‘lib, “Yashil makon” loyihasida fuqarolar va biznes ishtirokini kengaytirishga qaratilgan. Maqsad – bog‘lar, parklar, shuningdek botanika va dendrologiya hududlarini yaratish va saqlashga ko‘proq odam va biznesni jalb qilish.

Loyihaga ko‘ra, “Eko-sherik” maqomini jismoniy va yuridik shaxslar olishi mumkin. Buning uchun kamida ming tup daraxt va butalar ekilgan yashil bog‘ yoki jamoat parki yaratish hamda “Yashil” xayriya jamg‘armasiga kamida 200 million so‘m kiritish talab etiladi.

Maqom berish har yili o‘tkaziladigan tanlov natijalariga ko‘ra amalga oshiriladi. Har bir viloyatdan fuqarolar orasidan bittadan – jami 14 nafar g‘olib, shuningdek mamlakat bo‘yicha 10 ta eng yaxshi tashkilot aniqlanadi. Yakunlar bahorda sarhisob qilinadi: aprelda natijalar, mayda ko‘rib chiqish, 1-10 iyunda g‘oliblarga guvohnoma va esdalik sovg‘alari topshiriladi.

Maqom egalari, shuningdek, “Tabiat himoyachisi” ko‘krak nishoni bilan taqdirlashga tavsiya etiladi. Eng ko‘p ball to‘plagan ishtirokchi “O‘zbekiston Respublikasida xizmat ko‘rsatgan ekolog” faxriy unvoniga taqdim etilishi mumkin.

Shu bilan birga, “Eko-sheriklar” uchun cheklovlar mavjud: yaratilgan yashil hududlarda har qanday qurilish ishlarini olib borish taqiqlanadi.

Rag‘batlantirish choralari qatoriga davlat xizmatlariga 10% chegirma, shuningdek davlat ulushi 50% dan ortiq bo‘lgan banklardan iste’mol kreditlari olishda imtiyozlar kiradi.

Bundan tashqari, O‘zbekiston 2030 yilgacha mamlakat hududining ko‘kalamzorlashtirish darajasini 30% ga oshirishni rejalashtirmoqda. Ushbu maqsadli ko‘rsatkich Markaziy Osiyo davlatlarining rivojlanishiga jiddiy ta’sir ko‘rsatayotgan iqlim o‘zgarishi va cho‘llanish jarayonlariga qarshi tizimli ishlarning bir qismidir.

Source: podrobno.uz