Toshkent shahri hokimi Shavkat Umurzakov hayvonlarga nisbatan shafqatsiz va mas’uliyatsiz munosabatda bo‘lish holatlaridan jiddiy xavotir bildirdi. Bu haqda shahar hokimligi matbuot xizmatining shanba kungi xabarida aytiladi.
Hayvonlarga nisbatan zo‘ravonlik holatlari haqida deyarli har kuni xabar berilmoqda. Kuni kecha “Mehr va Oqibat” hayvonlarni himoya qilish jamiyati xonadonlardan birida yashovchi ayol mushukni kaltaklagani haqida so‘zlab bergan edi. Uning xonadonidan bir nechta mushuk topilgan. Gazeta ham hokimliklar huzuridagi ushlash xizmatlari tomonidan hayvonlarga shafqatsiz munosabatda bo‘linayotgani haqida bir necha bor yozgan.
“So‘nggi voqealar bu kabi holatlarga nafaqat tezkor munosabat bildirish, balki jamiyatda mehr-oqibat, mas’uliyat va barcha jonzotlarga hurmat madaniyatini izchil shakllantirish qanchalik muhimligini yana bir bor ko‘rsatdi”, — deyiladi poytaxt hokimligi xabarida.
“Xalqimizga har doim ezgulik, ojizlarga g‘amxo‘rlik va rahm-shafqat ko‘rsatish xos bo‘lgan. Hayvonlarga shafqatsizlik qilish an’ana va qadriyatlarimizga yotdir. O‘zini himoya qila olmaydiganlarga bo‘lgan munosabat butun jamiyatning axloqi va yetukligi ko‘rsatkichidir”, — deyiladi xabarda.
Hokimlikda Toshkentda “egasiz hayvonlar bilan muomalada bo‘lish bo‘yicha zamonaviy va insonparvar tizimni… amaliy tekislikka o‘tkazish” boshlangani ma’lum qilindi.
Yaqinda hokim apparati rahbari Shohruh Mamajonov, “Hayot” egasiz itlar boshpanasi asoschisi Iroda Matkarimova, obodonlashtirish sohasi va egasiz hayvonlarni tutish xizmati rahbarlari ishtirokida Toshkentda daydi itlar uchun ixtisoslashtirilgan boshpana tashkil etish masalasi bo‘yicha ishchi yig‘ilish bo‘lib o‘tdi.
“Gap faqat boshpana qurish haqida ketayotgani yo‘q. Vazifa — hayvonlarni xavfsiz va insonparvarlik bilan tutish, veterinariya ko‘rigidan o‘tkazish, emlash, bichish (sterillash), davolash, vaqtincha saqlash hamda ularga yangi egalar topishni o‘z ichiga olgan yaxlit tizimni yaratishdan iborat”, — dedi hokimlik vakillari.
Loyihaga soha mutaxassislari, veterinarlar, jamoatchilik va volontyorlik jamiyati vakillari jalb etiladi, deya ishonch bildirdi shahar ma’muriyati.
Hokimlik aholi, uy hayvonlari egalari, jamoat tashkilotlari va barcha befarq bo‘lmagan fuqarolarni “imkon qadar hayvonlarga nisbatan mas’uliyatli va insonparvar munosabatni shakllantirishga ko‘maklashishga: shafqatsizlik holatlariga befarq bo‘lmaslikka, o‘z uy hayvonlariga g‘amxo‘rlik qilishga va hayvonlarni himoya qilishga qaratilgan tashabbuslarni qo‘llab-quvvatlashga” chaqirdi.
“Toshkent aholi uchun xavfsiz va qulay, shu bilan birga hayvonlarga mehr-shafqat, g‘amxo‘rlik va mas’uliyat bilan munosabatda bo‘linadigan shahar bo‘lishi kerak”, — deya ta’kidladi hokimlik.
“Mushuk va itlar yonginamizda yashaydi va biz ular bilan yagona shahar hududini baham ko‘ramiz. Shu bois, aholi farovonligi haqida g‘amxo‘rlik qilish to‘rt oyoqli qo‘shnilarimizga — xoh egasiz, xoh uy hayvoni bo‘lsin — insonparvarlik bilan munosabatda bo‘lish masalalaridan ayri holda bo‘lishi mumkin emas”, — deya qo‘shimcha qildi shahar ma’muriyati.
Source: www.gazeta.uz