Toshkentning Yakkasaroy va Chilonzor tumanlarida giyohvand moddalarni zaxkaga solib tarqatgan ikki shaxsning faoliyati to‘xtatildi. Ularning uylarida o‘tkazilgan tintuvlar chog‘ida 2 kilogrammdan ortiq narkotik modda, shuningdek, ularni ishlab chiqarish va qadoqlash uchun maxsus jihozlar topildi.

3 avgust kuni o‘tkazilgan tezkor tadbirlar davomida Yakkasaroy tumanida 33 yoshli erkak va uning 34 yoshli sherigi qo‘lga olindi. Ikkinchisi avvalroq giyohvand moddalarning noqonuniy aylanishi bilan bog‘liq jinoyatlar uchun sudlangan edi.

Erkaklar gashishni zaxkaga solib tarqatayotgan vaqtda qo‘lga olingan. Ularga tegishli Nexia-3 avtomobilini ko‘zdan kechirish chog‘ida 20 gramm gashish moyi topilgan.

Qo‘lga olingandan so‘ng huquq-tartibot xodimlari ular ijaraga olgan kvartirani tekshirishdi. Ma’lum bo‘lishicha, uy narkolaboratoriya sifatida jihozlangan. Xonada ishlab chiqarish uchun zarur bo‘lgan to‘liq jihozlar, yana 2 kilogramm gashish moyi, marixuana va gashish, elektron tarozi, minglab zip-paketlar, shpritslar, tayyor dozalar va boshqa narsalar topilgan.

Umuman olganda, noqonuniy muomaladan 2,17 kilogramm — taxminan 10,7 ming doza narkotik modda olib qo‘yildi. Jinoyat ishi qo‘zg‘atildi.

Avvalroq sud Afg‘oniston fuqarosini O‘zbekistonga gashish olib kirishga urinayotgani uchun jarimaga tortgan edi. Narkotik modda uning davlat chegarasini kesib o‘tish chog‘ida topilgan.

Source: podrobno.uz