Toshkent hayvonot bog‘i ma’muriyati 13-avgust kuni hayvonlarga tosh otgan tashrif buyuruvchini qidirmoqda. Uning harakatlari tufayli sher Aleks va dikobrazlar jabr ko‘rgan bo‘lishi mumkin, ayniqsa dikobrazlar ochiq qafasda bo‘lgan.

Hayvonot bog‘i e’lon qilgan videoda erkak kishi hayvonlar tomon tosh otayotgani ko‘rinadi. Dikobrazlarning qafasi tepadan ochiq bo‘lgani uchun toshlar to‘g‘ridan-to‘g‘ri ichkariga tushgan.

Erkakning yonida turgan bola uning xatti-harakatlarini takrorlagan. Tashrif buyuruvchi esa buni o‘yin-kulgi deb hisoblab, har bir “aniq” otishdan keyin o‘ziga qarsak chalgan.

Hodisadan so‘ng hayvonot bog‘i xodimlari dikobrazlarni ko‘rikdan o‘tkazdi. Huquqbuzarning shaxsi hozircha videokuzatuv kameralari yozuvlari orqali aniqlanmoqda.

Hayvonot bog‘ida ta’kidlashlaricha, tashrif buyuruvchilarning xabarlari bunday holatlarga tezkor munosabat bildirishga yordam beradi. Hayvonlarga nisbatan shafqatsiz yoki noo‘rin xatti-harakatlarning guvohi bo‘lganlar zudlik bilan xodimlarga murojaat qilishlari yoki +998 71 289 16 01 raqamiga qo‘ng‘iroq qilishlari so‘raladi.

Xodimlar bunday qoidabuzarliklarni qayd etishda davom etishlarini va hayvonlarni himoya qilish choralarini ko‘rishlarini bildirmoqda.

Bu hayvonot bog‘i ochiq e’lon qilgan navbatdagi hodisa. Avvalroq tashrif buyuruvchi oq sherlar qafasi tomon suv purkagan edi. Keyinroq u aybini tan olib, uzr so‘ragan.

Source: podrobno.uz