Namangan viloyatida sotish maqsadida saqlanayotgan 32,6 ming o‘ram dori vositasi va tibbiy buyumlar topildi. Ularning umumiy qiymati 502,7 million so‘mni tashkil etadi.

Mingbuloq tumani Departament bo‘limi xodimlari boshqa huquqni muhofaza qiluvchi organlar bilan hamkorlikda tezkor tadbir o‘tkazdi. Ma’lumotlarga ko‘ra, avval sudlangan shaxs va uning sheriklari “Boburshoh” va “Porlok” mahallalarida omborxonalarni tashkil qilgan.

Jami 485 turdagi mahsulot aniqlangan. Dori vositalarining bir qismi davlat reestrida ro‘yxatdan o‘tmagan va muvofiqlik sertifikatlariga ega bo‘lmagan, ba’zi preparatlarning yaroqlilik muddati esa tugagan. Butun partiya ashyoviy dalil sifatida olib qo‘yildi.

Holat yuzasidan Jinoyat kodeksining 276-moddasi (“Sifatsiz yoki qalbaki dori vositalari va tibbiy buyumlarni sotish maqsadida saqlash, tashish va sotish, shuningdek ularni dorixonalardan tashqarida savdo qilish”) bo‘yicha jinoyat ishi qo‘zg‘atildi. Tergov harakatlari davom etmoqda.

Avvalroq Namanganda 56 turdagi 13,2 ming o‘ram dori vositasi saqlanayotgan yana bir ombor aniqlangani, uning qiymati 577,4 million so‘mni tashkil etgani haqida xabar berilgan edi.

Source: podrobno.uz