O'zbekistonda havaskor baliqchilik uchun asosiy xizmatlarni yagona platformada birlashtiruvchi Fisherman ID ("Baliqchi kartasi") raqamli tizimi yaratiladi. Bu tizim baliqchilik chiptalarini rasmiylashtirish, ularni to'lash, joylarni band qilish va QR-ruxsatnomalarni olish imkonini beradi.

Ekologiya va iqlim o'zgarishi bo'yicha Milliy qo'mita allaqachon tizimning potentsial ishlab chiquvchilaridan tijoriy takliflarni qabul qilishni boshladi. Loyihaga qo'yiladigan talablarga ko'ra, ochiq portal va baliqchilik zonalarining elektron reyestri, foydalanuvchining shaxsiy kabineti, baliqchilik chiptalarini rasmiylashtirish va to'lash tizimi, shuningdek, band qilish va QR-ruxsatnomalarni berish xizmati yaratilishi kerak.

Bundan tashqari, Fisherman IDda marketplace, mobil ilova va Payme, Click hamda boshqa zarur platformalar bilan integratsiya ko'zda tutilgan. Tizimni yaratish baliqchilik sohasini rivojlantirish to'g'risidagi prezident farmoni bilan nazarda tutilgan.

Fisherman ID havaskor baliqchilarning yagona elektron reyestrini va imtiyozli yillik abonementni o'z ichiga olishi kerak. Abonementlardan tushgan mablag'larni suv havzalarini tozalash va tabiiy suv ob'ektlarini baliq bilan boyitishga yo'naltirish rejalashtirilgan.

Avvalroq Sirdaryoda brakonerlarga qarshi reyd paytida Ekopolitsiya inspektori halok bo'lgani xabar qilingan edi. Dastlabki ma'lumotlarga ko'ra, u elektr qarmoq bilan noqonuniy baliq tutayotgan shaxslarni ushlashga urinayotganda suvga tushib ketgan.

Source: podrobno.uz