Jizzax viloyatida huquqni muhofaza qilish organlari tomonidan o‘tkazilgan tekshiruvlar natijasida ikki nafar "Damas" rusumli avtomobil haydovchisi aniqlangan. Har bir avtomobil salonida 28 nafardan bog‘cha tarbiyalanuvchisi bo‘lgan, jami ikki transport vositasida 56 nafar bola tashilgan.

Mazkur holat bolalar xavfsizligiga bevosita tahdid soladi, chunki "Damas" avtomobillari texnik jihatdan bunday miqdordagi yo‘lovchini xavfsiz tashishga mo‘ljallanmagan. Haydovchilar tomonidan yo‘l harakati qoidalari va yo‘lovchilarni tashish talablari qo‘pol ravishda buzilgan.

Huquqni muhofaza qilish organlari ota-onalarga murojaat qilib, o‘z farzandlarining xavfsizligiga befarq bo‘lmaslikka, transport vositalarida bolalarni tashishda belgilangan talablar va ruxsat etilgan yo‘lovchilar soniga qat’iy rioya qilishga chaqirdi.

Avvalroq ham shunga o‘xshash qoidalar buzilishi og‘ir oqibatlarga olib kelgan. Xususan, Andijon viloyatida "Tracker" rusumli avtomobil haydovchisi 21 nafar bolani tashiyotganida yo‘l-transport hodisasiga uchragan. Shuningdek, Navoiy viloyatida "Matiz" rusumli avtomobil haydovchisi 14 nafar bolani tashigan, natijada haydovchi halok bo‘lgan, salondagi voyaga yetmaganlar turli darajadagi jarohatlar olib, kasalxonaga yotqizilgan.

Ushbu holatlar bolalarni tashishda xavfsizlik qoidalariga rioya qilish zarurligini yana bir bor ko‘rsatadi. Ota-onalar va ta’lim muassasalari mas’uliyatni oshirishi, nazoratni kuchaytirishi lozim.

Source: podrobno.uz