Toshkent shahrining Sergeli tumanidagi bir qator mahallalarda 6-oktyabr kuni tabiiy gaz ta’minoti vaqtincha cheklanadi. Ushbu chora gaz quvurlarida rejali ta’mirlash va profilaktika ishlarini xavfsiz amalga oshirish maqsadida ko‘rilmoqda. Cheklovlar soat 11:00 dan 18:00 ga qadar davom etishi rejalashtirilgan.

Rasmiy ma’lumotlarga ko‘ra, ta’mirlash ishlari munosabati bilan tumanning "Madadkor", "Uchuvchilar", "Oltin Vodiy", "Habibiy" hamda "O‘zgarish" mahallalarida yashovchi aholi xonadonlarida gaz ta’minoti vaqtincha to‘xtatiladi. Mazkur hududlarda gaz tarmog‘idan uziladigan ob’yektlar ro‘yxatiga 51 ta ko‘p qavatli uy kiritilgan.

Shuningdek, maishiy iste’molchilardan tashqari hududda faoliyat yuritayotgan 12 ta yirik ulgurji iste’molchi, jumladan, korxona va tashkilotlar ham vaqtinchalik cheklovlarga duch keladi. Mas’ul tashkilot vakillari rejali ta’mirlash ishlari yakunlangach, tabiiy gaz bosqichma-bosqich qayta ulanishini ma’lum qildi.

"Hududgaz Poytaxt" filiali yuzaga kelgan noqulayliklar uchun barcha iste’molchilardan uzr so‘radi hamda xavfsizlik choralariga qat’iy rioya qilishni, ta’mirlash vaqtida gaz uskunalarini nazoratsiz qoldirmaslikni so‘radi.

Source: podrobno.uz