Joriy yil boshidan 1-oktabrga qadar Qurilish va uy-joy kommunal xo‘jaligi sohasida nazorat qilish inspeksiyasi tomonidan respublika bo‘ylab keng ko‘lamli o‘rganishlar amalga oshirildi. Mazkur davrda mutaxassislar 28 708 ta qurilish obyektida jami 301 272 ta monitoring tadbirlarini o‘tkazib, sohadagi mavjud holatni chuqur tahlil qilishdi. Ushbu raqamlar qurilish jarayonlarida nazorat qat'iylashtirilganiga qaramselectors, qoidabuzarliklar hamon ko‘pligicha qolayotganini ko‘rsatadi.

Hududiy inspeksiyalar tomonidan 23 121 ta ko‘p kvartirali uyning texnik holati maxsus o‘rganib chiqildi va natijada qonunchilik buzilishiga oid 9804 ta holat qayd etildi. Xususan, 403 ta holatda tayanch konstruksiyalar shikastlangani, 2385 tasida to‘suvchi konstruksiyalar buzilgani aniqlandi. Shuningdek, tutash yer uchastkalarida noqonuniy qurilishlar olib borish bilan bog‘liq 4743 ta holat va umumiy foydalanish joylarini o‘zboshimchalik bilan egallab olish bo‘yicha 1291 ta holat fosh etildi.

Bundan tashqari, yerto‘lalarning ichki va tashqi devorlari yonida tuproq qazish hamda sanitariya me’yorlarini buzish bilan bog‘liq yana 1150 ta qoidabuzarlik aniqlandi. Aniqlangan kamchiliklarni bartaraf etish maqsadida mas'ullarga bajarilishi shart bo‘lgan 215 907 ta yozma ko‘rsatma berilib, ularning ijrosi qat'iy nazoratga olindi. Ayrim og‘ir holatlarda esa talablarga zid ravishda qurilgan 3166 ta obyekt to‘g‘ridan-to‘g‘ri buzib tashlandi.

Sifat talablariga rioya etmagan va litsenziya shartlarini buzgan qurilish ishtirokchilariga nisbatan ham qat'iy choralar ko‘rildi. Xususan, ruxsat etuvchi hujjatlarning amal qilishini to‘xtatish yoki bekor qilish bo‘yicha 348 ta taqdimnoma kiritildi. Sifatsiz materiallardan foydalanilgani bois tegishli idoralarga 1650 ta taqdimnoma yuborilib, 1457 ta holat yuzasidan sudlarga da’vo arizalari kiritilgani ma'lum qilindi.

Monitoring davomida ichimlik va oqova suv tarmoqlarida ham jiddiy muammolar yuzaga chiqqani aniqlandi. Xususan, tarmoqlarda 5141 ta qoidabuzarlik aniqlanib, shundan 4053 tasi ichimlik suvi, 542 tasi esa oqova suv tarmoqlariga to‘g‘ri keldi. Hisoblagich plombalari buzilgani aniqlangan holatlar bo‘yicha suv ta’minoti tashkilotlariga jami 27,4 milliard so‘m qo‘shimcha to‘lov hisoblandi, shuningdek, budjet tashkilotlarida ham qator kamchiliklar bartaraf etildi.

Source: www.gazeta.uz