Oʻzbekiston hududida oktabr oyining ikkinchi yarmida ham quruq va nisbatan iliq ob-havo saqlanib qolayotgani haqida xabarlar tarqatilmoqda. Mutaxassislarning taxminlariga koʻra, joriy hafta oxirigacha mamlakat boʻylab yogʻingarchilik kutilmaydi, biroq ayrim hududlarda mavsumiy oʻzgarishlar sezila boshlaydi.

Oʻzgidromet maʼlumotlariga koʻra, havo harorati asosan kechalari +10…+15 daraja, kunduz kunlari esa +22…+27 daraja atrofida iliq boʻlishi kutilmoqda. Shu bilan birga, respublikaning shimoliy tumanlarida 17–18-oktabr kunlari biroz salqinroq havo kuzatilib, kechalari harorat +5…+10 darajagacha, kunduz kunlari esa +18…+23 darajagacha pasayishi taxmin qilinmoqda.

Shuningdek, togʻli hududlarda ob-havoning qisman oʻzgarishi kutilmoqda. Xususan, 16-oktabrda yogʻingarchilik kuzatilmasa-da, 17–18-oktabr kunlari ayrim togʻoldi va togʻli hududlarda yomgʻir yogʻishi, baland togʻlarda esa qorga aylanish ehtimoli borligi aytilmoqda. Shamol sharqdan 7–12 metr/soniya tezlikda esishi kutilmoqda.

Toshkent shahrida ham mazkur davrda barqaror va quruq ob-havo saqlanib turibdi. Poytaxtda shamol sharqdan 3–8 metr/soniya tezlikda esadi. Havo harorati kechalari +12…+14 daraja atrofida boʻlib, kunduz kunlari 16-oktabrda +24…+26 darajagacha, 17–18-oktabrda esa +22…+24 darajagacha iliq boʻlishi taxmin qilinmoqda.

Source: kun.uz