O'zbekistonda nodavlat ta'lim tashkilotlarida huquqbuzarliklarning oldini olish va xavfsizlikni ta'minlash maqsadida yangi chora-tadbirlar ko'rilmoqda. Ichki ishlar vazirligi tomonidan tayyorlangan va muhokamaga qo'yilgan Vazirlar Mahkamasi qarori loyihasiga ko'ra, xususiy maktab va universitetlarda maxsus ichki ishlar organlari xodimlari lavozimlarini joriy etish taklif etilmoqda. Ushbu tashabbus ta'lim muassasalarida tartibni saqlash hamda o'quvchi-yoshlar o'rtasida turli huquqbuzarliklarning oldini olishga qaratilgan.

Tasdiqlanishi kutilayotgan hujjatga asosan, yangi shtat birliklarini moliyalashtirish ta'lim muassasalarining o'z mablag'lari hisobidan amalga oshiriladi. Xususan, 2026-yilning 1-sentabridan boshlab oliy ta'lim muassasalarida profilaktika katta inspektori va xotin-qizlar masalalari bo'yicha katta inspektor lavozimlari ochilishi ko'zda tutilgan. O'rta va o'rta maxsus ta'lim maskanlarida esa voyaga yetmaganlar masalalari bo'yicha inspektor-psixologlar faoliyat boshlaydi.

Yangi lavozimlarni joriy etish uchun nodavlat ta'lim tashkiloti hududiy ichki ishlar organiga murojaat qilishi talab etiladi. Shundan so'ng tomonlar o'rtasida tegishli shartnoma tuzilib, shtat birliklari ichki ishlar vazirining buyrug'i asosida ochiladi. Ichki ishlar organlari buyruq chiqqanidan keyin bir oy muddat ichida bo'sh ish o'rnini malakali kadr bilan to'ldirishi shartligi belgilab qo'yilgan.

Tayinlangan inspektorlarning asosiy vazifalari qatoriga o'quvchilar va talabalar orasida bulling, zo'ravonlik, giyohvandlik hamda ekstremistik g'oyalar ta'sirining oldini olish kiradi. Shuningdek, ular darslarga qatnashmagan o'quvchilarning sabablarini o'rganish, davomatni nazorat qilish va xavf guruhidagi bolalar bilan maxsus profilaktik tadbirlarni amalga oshirishda ishtirok etishi rejalashtirilgan.

Source: www.gazeta.uz