Namangan viloyatida xorijda ishga joylashtirish bilan bog'liq navbatdagi firibgarlik holatiga chek qo'yildi. Ma'lum qilinishicha, mahalliy firmalardan birining rahbari to'rt nafar fuqaroni Yevropa davlatiga, xususan Polshaga mavsumiy ishga yuborishni va'da qilib, ulardan jami 10,4 ming dollar talab qilgan.

Huquqni muhofaza qiluvchi idoralar ma'lumotiga ko'ra, tezkor tadbir Davlat xavfsizlik xizmatining Namangan viloyati boshqarmasi hamda Bosh prokuratura huzuridagi Departamentning hududiy boshqarmasi xodimlari tomonidan hamkorlikda o'tkazilgan. Firibgar Turoqo'rg'on tumani aholisining ishonchiga kirib, ularni xorijiy ish bilan ta'minlashni bahona qilgan.

Huquq-tartibot idoralari xodimlari gumondonni kelishilgan mablag'ning bir qismi bo'lgan 4,4 ming dollarni olayotgan vaqtida ashyoviy dalillar bilan ushlashdi. Hozirda mazkur holat yuzasidan tergovoldi tekshiruv harakatlari olib borilmoqda.

Shu o'rinda Davlat xavfsizlik xizmati fuqarolarni ogohlikka chaqirib, chet elda rasmiy ish bilan faqat litsenziyalangan agentliklar shug'ullanishini eslatib o'tdi. Amaliyotda fuqarolarning ishonchidan foydalanib, ularning mablag'larini o'zlashtirishga urinish holatlari uchrab turishi ta'kidlandi. Eslatib o'tamiz, avvalroq ham Namangan viloyatida fuqarolarni Xorvatiyaga yuborishni va'da qilgan shaxs qo'lga olingan edi.

Source: podrobno.uz