Samarqand shahrida O'zbekiston birinchi xonimi Ziroat Mirziyoyeva tashabbusi bilan "Bolalar farovonligiga investitsiyalar: kelajak avlodlarning barqaror va adolatli taraqqiyot yo'li" nomli Global sammit tantanali ravishda ochildi. Ushbu nufuzli tadbirda xorijiy davlatlarning birinchi xonimlari, shuningdek, BMT, YUNISEF, Jahon banki, Jahon sog'liqni saqlash tashkiloti va boshqa yetakchi xalqaro tuzilmalarning yuqori martabali vakillari ishtirok etmoqda.

Forumning ochilish marosimida O'zbekiston Prezidenti Shavkat Mirziyoyevning ishtirokchilarga yo'llagan tabrik maktubi o'qib eshittirildi. Davlat rahbari o'z murojaatida bolalar farovonligi masalasi faqat kelajak emas, balki ularning bugungi hayotiga daxldor ekanini, har bir bola ayni damda g'amxo'rlik, xavfsizlik, sifatli ta'lim va tibbiy yordam olish huquqiga egaligini alohida ta'kidladi. Shuningdek, bolalik davriga qilinadigan investitsiyalar davlat siyosatida ustuvor o'rin egallashi lozimligi qayd etildi.

Maktubda mamlakatda amalga oshirilayotgan islohotlar tufayli maktabgacha ta'lim qamrovi 27,7 foizdan 78 foizga oshgani, so'nggi 5 yil ichida bolalar kambag'alligi darajasi deyarli 4 baravarga kamaygani va inklyuziv maktablar soni sezilarli darajada ko'paygani ma'lum qilindi. Shu bilan birga, Prezident bu sa'y-harakatlarning amaliy natijalari har bir oila hayotida sezilishi kerakligiga e'tibor qaratdi.

Shuningdek, og'ir bolalar kasalliklarini, jumladan, onkologik xastaliklarni erta aniqlash va davolashda xalqaro hamkorlikni kengaytirish zarurligi ko'rsatib o'tildi. Shu munosabat bilan, birinchi xonimlarning bolalar onkologiyasi yo'nalishidagi xalqaro hamkorlik tashabbusi qo'llab-quvvatlandi va amaliy muloqot mexanizmi sifatida Samarqand platformasini yaratish taklif etildi.

Source: podrobno.uz